اسلام آباد۔ 21 اگست (اے پی پی) قومی اسمبلی نا دیوان ءِ نیشنل پارٹی بلوچستان نا سروک میر حاصل خان بزنجو نا ماتن اٹ پدبِٹنگا، داوخت آ چندی سیاسی جماعت آتیان تعلق تخوک آ اسمبلی نا باسک آک میر حاصل خان بزنجو ءِ زبردست لوز آتیٹی خراج عقیدت پیش کرسا پاریر کہ اونا کزیت آن پاکستان نا سیاست اٹ ہرا خلا ودی مسنے اوپُر مننگ مفک، او پاکستان و بلوچستان نا حقی توار ئس۔ جمہوریت کن اونا جہد ءِ مدام یات تخنگک۔ جمعہ نادے آ قومی اسمبلی ٹی گپ وتران کرسا اسلم بھوتانی پارے کہ میرحاصل خان بزنجو نا کزیت پاکستان خاص وڑاٹ بلوچستان کن بھلو نسخان اسے۔ او مدام ساف وڑاٹ ہیت کرے۔ داوڑنا سیاستدان تا مدام کمتی محسوس مرسا کیک۔ اونا سوب آن ای داایوان نا باسک اُٹ۔ غوث بخش مہر پارے کہ حاصل بزنجو ننا سنگت ئس او اسہ سنجیدہءُ سیاست دان، گچین ءُ پاکستانی و بھلا باوہ نا مار ئس۔ او اقتدار نادور اٹی ہم گچین برتاؤ و طرزعمل نا درشانی ءِ کرے۔ او بھاز جوان ءُ بندغ اس ئس۔ اللہ تعالیٰ اودے جنت الفردوس اٹ جاگہ ایتے و پدسلوک آتے صبر کننگ نا توفیق ایتے۔ شکور شاہ پارے کہ حاصل بزنجو ننا کراچی یونیورسٹی تون اوار ئس۔ بدترین آمریت نا دور اٹی ہم حاصل بزنجو فعال سٹوڈنٹ لیڈر اس ئس۔ 1971ء ٹی ہراتم پاکستان اِرا بشخ مس تو بلوچستان نا جتاکننگ نا نعرہ لگا ۔ ہمووخت آ نواب اکبر بگٹی و حاصل بزنجو نا باوہ ئسک پاریر کہ ننا زند و مرک پاکستان تون ءِ۔ سیاسی کارندہ غاتا جہد ءِ ہراوخت اسکان یات تخنگک میر حاصل بزنجو نا پن ءِ ہم یات تخنگک۔ سید محمود شاہ پارے کہ بلوچستان اسہ عظیم ءُ راہشون اسے آن محروم مسنے۔ اونا صوبہ کن خذمت آتے مدام یات تخنگک۔ اوپارے کہ تربت نا واقعہ نا جاست وپاست کن کمیٹی اس جوڑ کننگے۔ آغاحسن بلوچ پارے کہ میر حاصل بزنجو بلوچستان کن مدام جہد کرے۔ اونا باوہ میر غوث بخش بزنجو بندی نا سختی تے برداشت کرے ولے بلوچستان کن جہد آ وخت اس ہم سمجھوتہ کتو۔ تربت نا واقعہ غا انکوائری کمیشن اس جوڑ کننگے۔ انجینئر صابر حسین قائم خانی پارے کہ میرحاصل خان بزنجو بھلا باوہ نا بھلا مارئس۔ اونا کزیت آن ننا سیاست اٹ خلاء ودی مسنے۔ محسن داوڑ پارے کہ میر حاصل خان بزنجو نا کزیت آن ہراخلا ودی مسنے اودے پُر کننگ مفک۔ رمیش کمار پارے کہ حاصل بزنجو تون اونا 20 سال انا اواری ئس۔ اونا قومی و سیاسی خذمت آتے مدام یات تخنگک۔
