اسلام آباد۔ 20 اگست (اے پی پی) یوٹیلیٹی اسٹورز کارپوریشن آف پاکستان تینا کارکڑد و حکومتی سرپرستی آن اِراسال انا چنکو وخت اسے ٹی نسخان آن پیش تمسا پاکستان نا غٹ آن بھلا خراج تروک آ ادارہ جوڑ مسنے، سال 2017-18ء ٹی ادارہ نا 5.46بلین نا انونٹری ئس وخت اس کہ مئی 2020ء اسکان یوٹیلیٹی اسٹور آتا انونٹری 15 بلین روپئی نا مالیت نا ءِ۔ یوٹیلیٹی اسٹورز کارپوریشن نا کمامدارآتارداٹ سال 2017-18ء ٹی ادارہ ءِ 6.634 بلین روپئی نا نسخان نا مون تروک ئس۔ سال 2018-19ء ٹی ادارہ نا زمہ وینڈرز نا 10.283 بلین روپئی واجب الادا ئسر وخت اس کہ جون 2020ء اسکان ادارہ نا زمہ وینڈرز نا 3.491 بلین روپئی واجب الادا ءُ۔ ادارہ نا کچ ءِ ہرسا وزیراعظم 8 جنوری 2020ء آ پرائم منسٹر ریلیف پیکج نا بناءِ کرے۔ دا ریلیف پیکج نا رداٹ ادارہ ءِ کنوئی آ گڑاتا ہلنگ کن پنچ ارب روپئی وخت اس کہ اسہ ارب روپئی نا سبسڈی تننگا تانکہ الس ءِ ریلیف فراوان کننگے۔ پرائم منسٹر ریلیف پیکج نا اولیکوفیز اٹی 17 اپریل 2020ء اسکان پنچ بنداوی المی آ گڑاتیا سبسڈی تننگا۔ روچہ مبارک اٹی پرائم منسٹر ریلیف پیکج نا دنگ ءِ ودفسا پنچ بنداوی المی آ گڑاتتون اوار 19 گڑاتیا الس ءِ روچہ ریلیف پیکج نا رداٹ سبسڈی تننگا۔ مبارک آ تُو اٹی ادارہ 22 ارب روپئی نا ریکارڈ سیل کرے۔ حکومتی سرپرستی نا سوب آن ادارہ نا سیلز 300 ملین روپئی آن ودسا 6 ارب روپئی اسکان مس و ادارہ نا زمہ واجب الادا وام تیٹی ہم پدریسہ کمتی بننگ بناکرے۔ تدوک آ شش تُو اٹی ادارہ 29.8 ملین اُراتے المی آ گڑاتا فراوانی ءِ پک کرے۔ مالی سال 2018-19ء ٹی ادارہ نا کل سی 9 ارب روپئی ئس وخت اس کہ مالی سال 2019-20ء ٹی ادارہ 50.832 بلین روپئی نا سیل کرینے۔ جولائی 2019ء آن مئی 2020ء اسکان ادارہ 7.09 بلین روپئی نا خراج تسنے۔
