اسلام آباد۔ 20 اگست (اے پی پی) کوویڈ۔ 19 نا سوب آن لاک ڈاؤن نا چٹفنگ آن پد مچ آ ملک اٹی رہینگوک آ رجسٹرڈ اوغان باہوٹ آک وطن آ پدی ہِننگ کن یو این ایچ سی آر تون رابطہ کرسا اوغانستان آ ہِننگ کن رجسٹریشن کرفنگ ءُ۔ پنچ شنبے نادے آ یو این ایچ سی آر نا ترجمان قیصر خان پارے کہ کوویڈ۔ 19 نا لاک ڈاؤن نا چٹفنگ آن پد یو این ایچ سی آر رجسٹرڈ اوغان باہوٹ آتا وطن آ پدی ہِننگ نا عمل نا بناءِ کننگانے وطن آ پدی ہِننگ نا عمل نا پڑو ءِ 10 اگست آ کننگانے۔ اوپارے کہ یواین ایچ سی آر نا پی او آر کارڈ ہولڈر رجسٹرڈ اوغان باہوٹ آک وطن آ پدی ہِننگ کن سنبرینگوک ءُ داتم اسکان 9 خاہوت آتا چناتتون اوار 43 بندغ وطن آ پدی ہِننگ کن درخواست تسنو اوفتے ٹی اسہ خاہوت اس کوئٹہ وخت اس کہ 8 خاہوت پشاور آن اوغانستان آ پدی ہِننگ کن باضابطہ رجسٹریشن کرفسا فارم ہلکونو۔ اسہ سوج اسے نا ورندی ٹی قیصر خان پارے کہ رجسٹرڈ اوغان باہوٹ آتے وطن آ پدی ہِننگ نا وخت آ 200 امریکی ڈالر فی بندغ ءِ تننگ انگ ءِ اوفتے ٹی چناک ہم اوار اریر۔
