اسلام آباد۔ 20 اگست (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پنشن اصلاحات اٹی جہانی بینک آن تکنیکی کمکاری ناخواست کرسا اصلاحات نا ایجنڈا ءِ برجاتخنگ و خراج نا بنداو اٹ ودکی و خڑچ آتا گچین انتظام و انصرام نا کمک اٹ پبلک فنانسنگ ءِ سوگو جوڑ کننگ آ زور شاغانے۔ داہیت ءِ او پنچ شنبے نادے داڑے پاکستان اٹی جہانی بینک انا ساڑی ٹی تعینات مروک آ کنٹری ڈائریکٹر ناجی بن حسائن تون اوڑدہی ٹی گپ وتران کرسا پارینے۔ ڈاکٹر عبدالحفیظ شیخ ناجی بن حسائن ءِ بخیر کرے و پاکستان و جہانی بینک انا نیام اٹ سوگو تعلقداری تا ستاءِ کرے۔ اوجہانی بینک انا کنٹری ڈائریکٹر ءِ ساڑی حکومت نا کنڈآن بناکروک آ اصلاحات نا بارواٹ معلومدار کرے وپارے کہ دا گام گیج آتا سوب آن پاکستان تدوک آ اِراسال اٹ زرتس آتیٹی توازن نا تنکی آن پیش تمانے و داسہ زرگزران ءِ سوگو کننگ اٹ کمک رسینگا۔ اوکورونادین انا جہانی دین آن زرگزران آ منفی زہم و اصلاحات نا پروگرام اٹ سست روی نا بارواٹ سرجم آتیان ہم معلومدار کرے۔ اوجہانی بینک انا کنٹری ڈائریکٹر ءِ کوویڈ۔ 19 تون مون تننگ کن حکومت نا حکمت عملی و زرگزران ءِ سیبو تننگ کن گام گیج آتیان ہم معلومدار کرے۔ اوپارے کہ وزیراعظم احساس کیش پروگرام آن اسہ کروڑ60 لکھ خاہوت فائدہ ہرفیر، ہنداوڑ چنکا و نیامئی درجہ نا واپار کن آسان وام، زرتس ءِ پدبٹنگ، و بجلی بل آتا زرتس نا حالیت اٹ کمک فراوان کننگا تانکہ اقتصادی سرجزآتا دُوارہ بحال مننگ نا حالیت اٹ او تیار مریر۔ ناجی بن حسائن کورونانا دین اتون مون تننگ نا رداٹ حکومت نا سوگو گام گیج آتا ستاءِ کرے۔ اوپارے کہ جہانی بیک ہلہلہ ئی گام گیج آتا رداٹ پاکستان تون کمک کرے و دین آن رکھ، پیدواری، گام گیج و جان جوڑی نا نظام ءِ سوگو کننگ کن چندی ڈٹ آتیٹی 500 ملین ڈالر نا کمک فراوان کرے۔ ڈاکٹر عبدالحفیظ شیخ دین اٹی جہانی بینک انا کمکاری نا ستا ءِ کرے و اصلاحات نا ایجنڈا ءِ برجاتخنگ نا گرج آ زور شاغا۔ اوخراج نا بنداو اٹ ودکی و خڑچ آتا گچین انتظام و انصرام نا کمک اٹ پبلک فنانسنگ ءِ سوگو کننگ آہم زور شاغا۔ اووزارت خزانہ نا کنڈآن بناکروک پنشن اصلاحات اٹ جہانی بینک آن تکنیکی کمکاری نا ہم خواست کرے۔ اوڑدہی ٹی کڑدہ غاک تعلقداری تے سوگو کننگ و جہانی بینک انا شونداری ڈٹ آتیا عملدرآمد اٹ اڑاند آتے مرکننگ آ امنا کریر۔
