ایم ایل ون ڈٹ بھاز اہم ءُ مزل نا نشان اسے، وزیراعظم عمران خان نا کماشی ٹی ریلوائی ءِ پوسکن ءُ زند اس ملنگ ءِ، چارتُو اٹی کراچی سرکلر ریلوائی ناٹریک شاغنہ، وزیر ریلوائی شیخ رشید احمد نا پریس کانفرنس

اسلام آباد۔ 20 اگست (اے پی پی) وزیر ریلوائی شیخ رشید احمد پارینے کہ ایم ایل ون ڈٹ بھاز اہم ءُ مزل نا نشان اسے، انگریز نا دور آن پد وزیراعظم عمران خان نا کماشی ٹی ریلوائی ءِ پوسکن ءُ زند اس ملنگ ءِ۔ پنچ شنبے نادے آ اسلام آباد اٹی پریس کانفرنس آن تران کرسا شیخ رشید احمد پارے کہ مین لین ون ڈٹ آن ریلوائی پوسکن آ دور اٹ پترینگک۔ چار تُو اٹی کراچی سرکلر ریلوائی نا ٹریک شاغنہ۔ اوپارے کہ وزیراعظم عمران خان تینا آئینی مد ءِ پورو کیک۔ اپوزیشن جماعت آک گروہ بندی نا گواچی ءُ۔ اوفتا است خواہی تے دِیر دیک و اوفتا است خواہیک است خواہی سلرہ۔ نیب زدہ مخلوق ہیت کننگ ءُ ولے عمران خان نا حکومت اٹ اوفتے این آر او ملیپک۔ نیب ہڑتوم آ کنڈآکارروائی کیک۔ شہباز شریف و حمزہ شہباز نا کیس بھاز سنجیدہ ءِ۔ مریم نواز مایوسی نا حالیت اٹ خل خونا کسر ءِ اختیار کرے۔ مریم نواز شریف نا سوب آن نواز شریف نا حالیت خراب مس۔ داسہ او مسلم لیگ ناحالیت آتے ہم خراب کننگ ءِ۔ وزیراعظم عمران خان ملک ءِ مون آ دننگ خواہک۔ پیپلزپارٹی و (ن) لیگ نا بھاز انگا مخلوق نابود مرسا نظر بننگ ءُ۔ اسہ سوج اسے نا ورندی ٹی شیخ رشید احمد پارے کہ جمہوری حکومت و پاک فوج اسہ لین ولینتھ آٹو و ہڑتوم آک اوار چلینگ انگ ءُ و ملک ءِ مون آ دننگ خوارہ۔ حکومت ءِ کوروناوائرس نا چیلنج مون تروک ئس۔ اوکان پد ہم زرگزران گچینی نا کنڈآ ہِننگ ءِ و حکومت نا مسٹ میکو سال بے مٹ ءُ سال اس مریک۔ بورہ و نُت انا ویل ءِ ایسر کینہ۔ شیخ رشید احمد پارے کہ سعودی عرب تون ننا اسہ تعلق اسے و چین ہم ہر باندات اٹی پاکستان تون تفینے۔ پاک چین سنگتی ہمالیہ غان بڑزءِ۔