اسلام آباد۔ 20 اگست (اے پی پی) بنجائی وزیر سائنس اینڈ ٹیکنالوجی فواد چوہدری پارینے کہ پاک سعودی تعلقداری رکھوک ءِ، وجہانی منظرنامہ نا بدلی آ منحصر افس، حرمین شریفین نا تقدس ہر مسلمان نا ایمان نا بشخ اسے۔ داہیت ءِ او پاکستان اٹ تعینات سعودی سفیر نواف بن سعید المالکی تون گپ وتران کرسا پارے ہراپنچ شنبے نادے آ اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری و تین پہ تینی کمکاری ءِ مون آ دننگ آ گپ وتران کننگا۔ فواد چوہدری پارے کہ پاکستان و سعودی عرب نا تعلقداریک بیرہ حکومتی کہول اسکان افس بلکن دا تعلقداریک سعودی و پاکستانی قوم انا نیام اٹ جوڑ ءُ۔ اوپارے کہ پاک سعودی تعلقداریک رکھوک ءُ و جہانی منظر نامہ نا بدلی آ منحصر افس ۔ فواد چوہدری پارے کہ سعودی ولی عہد شہزادہ محمد بن سلمان نا دورہ پاکستان و وزیراعظم عمران خان نا دورہ سعودی عرب پاک سعودی تعلقداری تا سوگوی نا ڈیک ءِ۔ اوپارے کہ حرمین شریفین نا تقدس ہر مسلمان نا ایمان نا بشخ ءِ وخادمین حرمین شریفین نا شرف ہر مسلمان آ لازم ءِ۔ فواد چوہدری وزارت سائنس اینڈ ٹیکنالوجی ٹی برجا ڈٹ آتا بارواٹ سعودی سفیر ءِ معلومدار کرے۔ سعودی سفیر فواد چوہدری نا وزارت سائنس اینڈ ٹیکنالوجی ٹی اصلاحات اتنگ نا کوشست آتا ستاءِ کرے۔ فواد چوہدری سعودی کمپنی تے پاکستان نا کشت وکشار نا بشخ اٹ کمکاری و زرکاری آ زور شاغا۔ سعودی سفیر پاکستان نا ہر بشخ اٹ پبی کمکاری نا باوری کرفے۔
