اسلام آباد۔ 20 اگست (اے پی پی) وزیراعظم عمران خان بینک آتا کنڈآن تعمیرات نا بشخ اٹ متحرک کڑد ادا کننگ نا عزم آ است جمی نا درشانی ءِ کرسا پارینے کہ تعمیرات نا بشخ زرگزران ءِ مون آ دننگ نا ضامن ءِ، تعمیرات نا بشخ انا مون آ دننگ آن بینک آتیکن کٹیا کروک کاروبار نا بے شمار وارخواہی دُوبریک، اُراتا تفنگ نا بابت درخواست آتے آسان و سہل کننگے، کم و درمیانہ کٹیا کروک بندغ آک دا آسراتی آن زیات آن زیات فائدہ ہرفنگ کیر۔ وزیراعظم آفس آن جاری بیان نا رداٹ داخیال آتا درشانی ءِ او تینا کماشی ٹی نیشنل کوآرڈینیشن کمیٹی ہاؤسنگ، کنسٹرکشن اینڈ ڈویلپمنٹ نا ہفتہ وار دیوان آن تران کرسا کرے۔ دیوان اٹی وزیر حوالکاری سینیٹر شبلی فراز، خصوصی کمکار ملک امین اسلم، لیفٹیننٹ جنرل(ر) عاصم سلیم باجوہ، سید ذوالفقار عباس بخاری، ڈاکٹر شہباز گل، گورنر اسٹیٹ بینک ڈاکٹر رضا باقر ، چیئرمین نیا پاکستان ہاؤسنگ اتھارٹی لیفٹیننٹ جنرل (ر) انور علی حیدر وایلوسینئر آفیسر آک ساڑی ئسر۔ دیوان اٹی ملک انا غٹ بھلا بینک آتا صدر و آباد نا نمائندہ غاک ہم ساڑی ئسر۔ دیوان اٹی بشخ ہلوک آتے تعمیرات نا بشخ اٹی بینک آتا کنڈآن آسان وام و زر انا فراوانی نا بابت مروک آ پیش رفت آ حوال تسر۔ صدر پاکستان بینکس ایسوسی ایشن وزیراعظم ءِ بریف کرسا پارے کہ حکومت نا کنڈآن تعمیرات نا مون آ دننگ کن موافق پالیسی و بینک آتیکن کمکاری آن نجی بینک آتا است بڈی مسنے۔ غٹ بینک آک تعمیرات نا مون آ دننگ خاص کر کم و درمیانہ کٹیا کروک بندغ آتے اُرا تا آسراتی نا فراوانی ٹی تینا کڑد ءِ ادا کننگ کن سنبرینگوک ءُ۔ صدر بینک آف پنجاب و صدر بینک الفلاح پوسکن آپاکستان ہاؤسنگ پروگرام نا رداٹ اُراتا تفنگ نا مون آ دننگ کن درستی راستی کرفوک آ پروڈکٹ آتیا حوال تسر۔ ایلو بینک آتا صدر آک وزیراعظم ءِ پاریر کہ تعمیرات نا مون آ دننگ نا بابت بینک آتا کنڈآن پراڈکٹ تیار کننگانے ہرافتے بھاززوت درستی راستی کرفنگک۔ وزیراعظم بینک آتا کنڈآن تعمیرات نا بشخ اٹی متحرک کڑد ادا کننگ نا عزم آ است جمی نا درشانی ءِ کرسا پارے کہ تعمیرات نا بشخ زرگزران نا مون آ دننگ نا ضامن ءِ۔ اوپارے کہ تعمیرات نا بشخ انا مون آ دننگ آن بینک آتیکن کٹیا کروک بزنس نا بے شمار وارخواہی دوبریک۔ وزیراعظم پارے کہ حکومت نا کنڈآن بینک آتا غٹ گڑتی تے مُر کننگانے۔ بینک آتا کنڈآن تروک آ وام تیا حکومت نا کنڈآن پڑوکروک سبسڈی نا دمدستی فراوانی کن اسٹیٹ بینک ءِ واکدار جوڑ کننگانے۔ فور کلوژر کانود نا معاملہ نا گچین پیروی ءِ کننگ انگ ءِ۔ وزیراعظم عمران خان بینک آتے پارت کرے کہ اُراتا تفنگ نا بابت درخواست آتے آسان و سہل کننگے تانکہ کم و درمیانہ کٹیا کروک بندغ آک داآسراتی آن زیات آن زیات فائدہ ہرفنگ کیر۔
