اسلام آباد۔ 19 اگست (اے پی پی) وزیراعظم عمران خان پارینے کہ ملکی زرگزران ءِ بڑزا دننگ کن ورناتے اسٹیک ہولڈر کروئی مریک، سرسہب ورنا پروگرام نا تینٹ مانیٹرنگ ءِ کننگ اٹی اُٹ، زر انا بشخنگ نا عمل ءِ پین ترند و شفاف وڑاٹ پورو کننگے، کوروناوائرس نا دین انا ملکی زرگزران آ منفی زہم تے چٹفنگ کن دا پروگرام بھاز المی ءِ۔ وزیراعظم آفس نا میڈیا ونگ انا رداٹ داخیال آتا درشانی ءِ وزیراعظم خصوصی کمکار عثمان ڈار و سلاہکار خزانہ حفیظ شیخ تون گپ وتران کرسا کرے ہرافک اوڑتون چارشنبے نادے آ اوڑدہی کریر۔ اوڑدہی ٹی وزیراعظم ءِ سرسہب ورناپروگرام نا تازہ انگا حساب وکتاب تیا حوال تننگا و پروگرام نا رداٹ ورناتیٹی زر انا بشخنگ نا عمل ءِ ترند کننگ آ سلابت ہم کننگا۔ منہ دے اٹی 30 ہزار آن زیات ورناک زر انا دوئی کننگ کن درخواست تسنو۔ حوال اٹی وزیراعظم ءِ پاننگاکہ ورناتا آسراتی کن 21 بینک زر انا بشخنگ نا عمل ءِ پورو کیرہ۔ داتم اسکان 1 ارب روپئی نا زر ورناتیا بشخنگانے۔ پین 53 ارب روپئی آن زیات زر انا دوئی کننگ نا درخواست ملانے۔ داوخت آ وزیراعظم عمران خان پارے کہ زر انا بشخنگ نا عمل ءِ پین ترند و شفاف وڑاٹ پورو کننگے۔ کورونا نا ملکی زرگزران آ منفی زہم آتے چٹفنگ کن داپروگرام بھاز المی ءِ۔ اوپارے کہ ملکی زرگزران ءِ بڑزا دننگ کن ورناتے اسٹیک ہولڈر کروئی مریک۔ ورناتے ہرہمو آسراتی ءِ ایتنہ ہراڑآن او روزگار نا وارخواہی دوئی کیر۔ پروگرام اٹی زرانا بشخنگ نا عمل آ پورو نظر تخر۔ وزیراعظم پارے کہ شفافیت و میرٹ آ ہچ ءُ وڑاسے ٹی سمجھوتہ کننگپ۔ سرسہب ورناپروگرام نا تینٹ مانیٹرنگ ءِ کننگ اُٹ۔ وزیراعظم پروگرام اٹ پیش رفت آ ماہانہ حوال ہلنگ نا ہم فیصلہ ءِ کرسا خصوصی کمکار عثمان ڈار ءِ ہر تُو آن پد جاچ رپورٹ پیش کننگ نا پارت کرے۔ وزیراعظم پروگرام اٹی داتم اسکان نا پیش رفت آ است جمی نا درشانی ءِ کرے۔
