لاہور۔ 19 اگست (اے پی پی) گورنر پنجاب چوہدری محمد سرور تون داڑے گورنر ہاؤس اٹی چارشنبے نادے آ اسپیکر قومی اسمبلی اسد قیصر و صوبائی وزیر حوالکاری فیاض الحسن چوہان جتا جتا اوڑدہی کریر۔ ہراٹی پارلیمانی، حکومتی و سیاسی باندات تون اوار ایلو معاملہ غاتا بارواٹ گپ وتران کننگا۔ اوڑدہی ٹی پولیٹکل سیکرٹری ٹو گورنر پنجاب میاں کاشف اقبال و پنجاب حکومت نا سوشل میڈیا فوکل پرسن میاں انس اسلم ڈولہ ئسک ہم ساڑی ئسر۔ اسپیکر قومی اسمبلی اسد قیصر تون اوڑدہی ٹی گورنر پنجاب چوہدری محمد سرور پارے کہ اپوزیشن قومی فائدہ غاتیٹی مروک آ کانود سازی ٹی حکومت تون تفر۔ حکومت پارلیمنٹ تون اوار ادارہ غاتا سوگوی آ یخین تخک۔ اوپارے کہ ادارہ غاتا سوگوی آن پاکستان سوگو و شونہال مریک۔ اونا پاننگ ئس کہ الحمداللہ پاکستان نا ترندی اٹ اینو دنیا ٹی دروشم گچین مننگ ءِ، وزیراعظم عمران خان نا کماشی ٹی حکومت مشکل ولے سہی ءُ فیصلہ کننگ ءِ۔ اوپارے کہ لس بندغ کن احساس پروگرام کون آ ڈٹ حکومت نا تاریخی ءُ گام اسے نن ملک ءِ سرسہبی اٹ مون آ دننگ اُن۔ صوبائی وزیر حوالکاری تون اوڑدہی ٹی چوہدری محمد سرور پارے کہ حکومت نا 2 سال پورو مسر ایلو 3 سال ءِ ہم پورو کینہ۔ اوپارے کہ وزیراعظم عمران خان نا ایماندار آ اسٹ اس ہم ہور بڑزا کننگ کپک۔ او پارے کہ ملک اٹ ہڑدڑی و نااومیتی تالان کروک آتے مایوسی آن بیدس ہچ اس ملیپک۔ گورنر پارے کہ آئین و کانود نا حکمرانی آ حکومت ہچ ءُ سمجھوتہ اس کپک۔ اوپارے کہ ملک اولیکو وار سہی سمت اٹ سرسہبی اٹ مون آ ہِننگ ءِ۔ چوہدری محمد سرور پارے کہ راج انا نزور تپہ غاتا سوگوی کن عملی گام گیج کننگ اُن ملک ءِ مون تروک چیلنج آتون مون تننگ کن حکومتی پالیسیک سرسہب مننگ ءُ۔ اوپارے کہ زرگزرانی و سفارتی پڑ آ پاکستان دننیا ٹی تینا ہند اس جوڑ کرینے موڈیزو فیچ ہم پاکستان نا زرگزرانی ریٹنگ ءِ مثبت گوندنگ ءُ۔ اسپیکر قومی اسمبلی اسد قیصر پارے کہ اسمبلی ٹی غٹ باسک آتے ہیت کننگ نا اسہ وڑ موقع تننگک و الس ءِ مون تروک ویل آتے تالان کننگ انگ ءِ۔ اوپارے کہ ملکی شونداری کن غٹ سیاسی جماعت آک تینا مثبت کڑد ادا کیر ننا غٹ انا زمواری ءِ کہ پاکستان نا برخلاف سازش کروک آ دشمن تے بے سہب کننگ کن اواری اٹ کاریم کین۔ صوبائی وزیر حوالکاری فیاض الحسن چوہان پارے کہ وزیراعظم عمران خان ہمواسٹ انگا راہشون ءِ ہرا ملک ءِ سوگو و شونہال کننگ کیک۔ اوپارے کہ حکومت تینا گچین ڈٹ بندی اٹ ملک ءِ زرگزرانی وڑاٹ خواتہ مننگ آن بچفینے۔ اوپارے کہ پوسکن آ پاکستان ہاؤسنگ اسکیم و احساس پروگرام نیزگار دوستی نا عظیم درور اسے و الس حکومتی پالیسی تتون سلوک ءِ۔
