اسلام آباد۔ 19 اگست (اے پی پی) پاکستان انسانی ہمدردی نا جہانی دے انا وخت آ جہانی برادری آ زور شاغانے کہ او بھارتی غیر کانودی مقبوضہ جموں و کشمیر اٹ ودوک آ است ہسون حالیت آتے گچین کننگ کن ہروڑنا گام گیج کے۔ چارشنبے نادے آ جہانی انسانی ہمدردی نا جہانی دے انا وخت آ دفترخارجہ نا ترجمان زاہد حفیظ چودھری پارینے کہ جہانی برادری بھارتی غیر کانودی مقبوضہ کشمیر اٹ اسہ سال آن زیات برجافوجی گھیڑ ءِ چٹفنگ و کشمیری تسکان رسینگ اٹ تینا کڑد ءِ ادا کے، ہرافتے جان جوڑی و ایلو بنداوی گرج فراوان کننگ نا سخت گرج ءِ۔ ترجمان پارے کہ نن جھیڑہ غاتا توننگ و متکن آ جھیڑہ و جنگ آتا پرامن ایسری کن جامع حکمت عملی اس جوڑ کننگ نا گرج انا درشانی ءِ کینہ۔ ترجمان پارے کہ نن انسانی جان تے بچفنگ و جھیڑہ غاتیان زہمی بندغ آتے رکھ و امداد نا فراوانی ٹی قربانی تروک آ ہیومنیٹیرین کارندہ غاتے خراج عقیدت پیش کینہ۔ ترجمان پارے کہ نن بھلو کچ اسے آ باہوٹ آتا مہمانداری ءِ کروک آ ملک آتا بھاریم و زمواری تے شیئر کننگ نا بابت جہانی برادری نا دا اصول آتا است بڈی ءِ کینہ۔ اوپارے کہ پاکستان و پاکستانی الس تدوک آ کیہی دہائی تیان لکھ آ اوغان باہوٹ آتا مہمانداری ءِ کرسا گچین سخاوت و است بھلنی نا درشانی ءِ کرینو۔ ترجمان پارے کہ نن اوغان باہوٹ آتا خیالداری ٹی کمک کننگ آ تینا شریدار خاص وڑاٹ یواین ہائی کمشنر باہوٹ نا منت وار اُن۔
