اسلام آباد۔ 19 اگست (اے پی پی) اسپیکر قومی اسمبلی اسدقیصر و ڈپٹی اسپیکر قومی اسمبلی قاسم خان سوری نیشنل پریس کلب نا پوسکن گچین مروک آ عہدیدار آتے نیشنل پریس کلب نا سال 2020ء نا گچین کاری تیٹی سرسہبی آ مبارکبادی تسنو۔ چارشنبے نادے آ تینا جتا جتا تہنیتی کلہو آتیٹی اوفک نیشنل پریس کلب نا پوسکن گچین مروک صدر شکیل انجم، سینئر نائب صدر ارشد وحید چوہدری، سیکرٹری جنرل انوررضا، سینئر جوائنٹ سیکرٹری احتشام الحق، سیکرٹری فنانس، صغیر چوہدری و ایلو عہدیدار آتے مبارکباد ترسا پارینو کہ نیشنل پریس کلب نا گچین کاری ٹی اوفتا سرسہبی صحافتی برادری نا کنڈآن اوفتیا پت انا درشانی ءِ۔ اوفک ملک اٹی جمہوری اقتدار نا مون آ دننگ، جمہوریت نا سوگوی، آجوئی سلاہ نا درشانی وصحافی برادری نا حق انا رکھ و اوفتے مون تروک ویل آتے ایسر کننگ اٹ پریس کلب نا کڑد انا ستاءِ کریر۔ اسپیکر و ڈپٹی اسپیکر نا پاننگ ئس کہ ملک اٹی جمہوریت نا سوگوی کن صحافتی برادری نا کڑد کلیدی اہمیت تخک۔ و ساڑی حکومت آجوئی سلاہ درشانی آ باور کیک و صحافتی برادری ءِ مون تروک ویل آتے ایسر کننگ کن اولیتی بنداو تیا گام گیج کننگ ءِ۔ اوفک دااومیت نا درشانی ءِ کریر کہ نیشنل پریس کلب نا پوسکن گچین مروک کابینہ صحافی برادری ءِ مون تروک ویل آتے ایسر کننگ، ملک اٹ جمہوریت نا سوگوی و السی ویل آتے تالان کننگ کن پبی کڑد ادا کیرہ۔ اسپیکر و ڈپٹی اسپیکر پاریر کہ او نیشنل پریس کلب نا پوسکن گچین مروک آ کابینہ نا سرسہبی کن دعاکیرہ۔
