اسلام آباد۔ 19 اگست (اے پی پی) فیڈرل بورڈ آف ریونیو (ایف بی آر) نا پوائنٹ آف سیل نظام تون داتم اسکان 7 ہزار نا خڑک کاروبار گنڈنگانو وخت اس کہ ٹیئر۔ون اٹ اوار ریٹیل آؤٹ لیٹ آتے رجسٹرڈ کرفنگ نا آخیریکو تاریخ 31 اگست 2020ء ءِ۔ ایف بی آر نا کمامدارآتارداٹ پوائنٹ آف سیل نظام آ عملدرآمد برجاءِ، دا نظام نا رداٹ داتم اسکان 7 ہزار آن زیات کاروبار رجسٹرڈ مسنو، ایف بی آر زرگزرانی سرجز آتا پورو بحالی نا حالیت اٹ دانا کچ ءِ اول 15 ہزار و ولدا اودے پدریسہ 25 ہزار اسکان سرکننگ نا ہدف مقرر کرینے۔ دانظام نا رداٹ ریٹیل اسٹور تیا ہلنگ نا وخت آ رسید نا کاپی خودکار نظام نا رداٹ ایف بی آر نا نظام نا بشخ مریک۔ دانظام آن تعلقدار غاو تا ازالہ ءِ ہم کننگ انگ ءِ۔ ایف بی آر نا رداٹ دانظام نا دنگ ءِ پدریسہ مچ آ ملک اسکان تالان کننگ انگ ءِ۔ ایف بی آر اسہ وار ولدا غٹ بھلا ریٹیلیر تے یات دہانی کرفینے کہ او ایف بی آر نا پی او ایس نظام اتون 31 اگست 2020ء اسکان منسلک مریر۔ ہمو غٹ بھلا ریٹیلرہرافتا مچ آ ملک اٹی چین اسٹورزءُ۔ ایئرکنڈیشنڈ شاپنگ مال آتیٹی واقع ءُ، اوفتا بجلی نا بل تدوک آ سال دُوانزدہ لکھ آن گدرینگانے، دوکان نا سائز اسہ ہزار مربع فٹ یا اونا زیات مرے یا ولدا ہموریٹیلر ہراکہ بھلو کچ اسے ٹی تھوک انا حساب اٹ گڑاتا درآمد یا سپلائی کیرہ اوفتا غٹ اکن المی ءِ کہ او 31 اگست 2020ء اسکان تینا غٹ ریٹیل ہند پی او ایس نظام تون منسلک کیر۔ ایف بی آر نا رداٹ آخیریکو تاریخ نا گدرینگ انگ آن پد اوفتیا دہ لکھ روپئی اسکان جرمانہ بیٹ کننگ مریک و جرمانہ نا زرتس آن پد پین خلاف ورزی آ داوڑنا غٹ ریٹیل ہند آتے بند کننگک۔
