اسلام آباد۔ 18 اگست (اے پی پی) ملکی پارلیمانی تاریخ نا 15 می قومی اسمبلی تدوک آ 2 سال اٹی جم وڑاٹ 42 بل آتون اوار توہین آمیز خاکہ، تحفظ ختم نبوت، بھارتی غیر کانودی مقبوضہ کشمیر اٹ ظلم و جور و غیر کانودی گام گیج آتا بابت 43 قرارداد آتا منظوری ءِ تس۔ قومی اسمبلی سیکرٹریٹ نا حوالی نا رداٹ 25 جولائی 2018 ء نا لس گچین کاری تیٹی 15 می قومی اسمبلی 13 اگست 2018 ء آ سوغند ہرفے۔ تدوک آ اِراسال اٹی پارلیمنٹ نا 6 اسیجائی دیوان اڈ ہلک ہرافتیان 17 ستمبر 2018ء و 12 ستمبر 2019ء آ صدر مملکت ڈاکٹر عارف علوی تران کرے۔ 19 فروری 2020ء آ ترک صدر رجب طیب اردوان پارلیمنٹ نا ہڑتوم آ ایوان تا اسیجائی دیوان آن تران کرے۔ داکان بیدس پاکستان ءِ بھارت نا کنڈآن تروک آ دھڑکو تیا شرہ کننگ کن 28 فروری 2019ء آ پارلیمنٹ نا ہڑتوم آ ایوان تا خصوصی اسیجائی دیوان اس اڈ تننگا۔ قومی اسمبلی اِراسال اٹی 2 نجی بل آتا ہم منظوری ءِ تس ہرافتے ٹی پاکستان انسٹی ٹیوٹ آف پارلیمنٹری سروسز بل و دستور (ترمیمی) ہم اوار ءُ۔ دستور ترمیمی بل آئین نا آرٹیکل 51 و 106 اٹی ترمیم تیا تالان ءِ ہرا فاٹا نا صوبائی و قومی اسمبلی نا نشست آتا بابت ءِ۔ دا بل ءِ قومی اسمبلی منظور کرسا سینٹ آ گدریفینے۔ قومی اسمبلی 40 حکومتی بل آتا منظوری ءِ تس ہرافتے ٹی اِرٹ فنانس بل ہم اوار ءُ۔ دا بل آتیٹی انسداد دہشت گردی (ترمیمی) بل 2020ء، اقوام متحدہ سیکورٹی کونسل(ترمیمی)بل 2020ء، زینب الرٹ بل 2020ء، پاکستان آرمی (ترمیمی)بل 2020ء، پاکستان ایئر فورس (ترمیمی)بل 2020ء، پاکستان نیوی (ترمیمی) بل 2020ء، 26 می آئینی ترمیم بل 2019ء، گچین کاری ترمیم بل 2019ء و اسلام آباد ہائی کورٹ (ترمیمی)بل 2019ء تون اوار ایلوفک ہم اوار ءُ۔ ساڑی آ قومی اسمبلی تدوک آ اِراسال اٹی پارلیمانی سال انا دے تے پورو کرے۔ قومی اسمبلی ہرا43 امنائی قرارداد آتا منظوری ءِ تس اوفتے ٹی ڈچ پارلیمنٹ اٹ توہین آمیز خاکہ غاتا مذمت، ملک اٹی پوسکن آ ڈیم تا تفنگ، ملک اٹ ساف دیر انا فراوانی کن فلٹریشن پلانٹ آتا خلنگ، بیگم کلثوم نواز نا کزیت آ ہڑزخواہی، وزیراعظم آزاد کشمیر نا ہیلی کیپٹر آ بھارتی جلہو نا مذمت، ایوان اٹ تلاوت کلام پاک و نعت رسول مقبول صلی اللہ علیہ و آلہ وسلم آن پد قومی ترانہ ءِ خلنگ، مولانا سمیع الحق نا خون نا مذمت، مقبوضہ جموں و کشمیر اٹی 27 اکتوبر 1947ء نا یات اٹی تہاردے، خواجہ نبی پاک صلی اللہ علیہ و آلہ وسلم نا یوم ولادت، مقبوضہ کشمیر نا مظلوم الس ءِ حق خودارادیت تننگ نا خواست، آرمی پبلک اسکول نا کودک طالب آتا شہادت، 26 و 27 فروری 2019ء آ بھارتی جارحیت نا مذمت، بھارت نا کنڈآن مقبوضہ کشمیر نا جغرافیائی حیثیت ءِ بدل کننگ نا مذمت، ناروے ٹی قرآن پاک انا بے حرمتی نا ناپاک حرکت نا مذمت، انڈین سٹیزن(ترمیمی) ایکٹ2019ء نا مذمت، بھارت اٹی مسلمان تا نسل کشی نا مذمت، مچ آ ملک اٹی اسہ وڑ نصاب تعلیم رائج کننگ، بنجائی دارالحکومت نا غٹ یونیورسٹی تیٹی اردو ترجمہ تون قرآن پاک نا تعلیم و مون آ دننگ، غٹ سرکاری و غیر سرکاری دستاویز آتیٹی خواجہ اکرم صلی اللہ علیہ و آلہ وسلم نااسم مبارک صلی اللہ علیہ و آلہ وسلم تون لکھنگ ءِ المی گوندنگ وخواجہ نبی اکرم صلی اللہ علیہ و آلہ وسلم نا اسم مبارک تون خاتم النبین پاننگ و لکھنگ تون اوار ایلو قرارداد آتا منظوری ءِ تننگا۔
