اسلام آباد۔ 18 اگست (اے پی پی) حکومت نا کنڈآن مچ آ ملک اٹی فرقہ وارانہ و بین المذاہب ہم آہنگی ودی کننگ، حج بست وبند آتے گچین کننگ نا حق ءِ اسلامی رغاموک و آئین نا رداٹ اقلیت آتا حق ءِ پک کننگ، اسلام نا امن نا کلہو ءِ لس کننگ و راج اٹ سگ و سینہ ودی کننگ نا بابت وزارت مذہبی امور نا کارکڑد ءِ ستاکڑزوک گوندنگانے۔ سے شنبے نادے آ حکومت نا کنڈآن جاری کروک اِراسال انا کارکڑد رپورٹ نا رداٹ وزارت مذہبی امور وزیر مذہبی امور پیر نور الحق قادری نا کماشی ٹی ملک اٹی خارتس تقریر و مواد آتا شینک کننگ نا سدباب، اقلیت آتے اسلامی رغاموک و آئین نا رداٹ ہند تننگ نا بابت بین المذاہب ہم آہنگی ودی کننگ و ملک اٹی چندی تپہ فکر آن تعلق تخوک آ عالم دین تا سلابت اٹ فرقہ وارانہ ہم آہنگی ودی کننگ نا بابت گام گیج آتا سرجمی اٹ ذکر ءِ کننگانے۔ وزارت مذہبی امور کورونا نا حالیت آتا رداٹ مسیت آتیٹی روچہ مبارک اٹی ایس او پی تا جوڑ کننگ، محرم الحرام نا دے تیٹی امن و ایمنی نا حالیت آتے برقرار تخنگ و کورونا وائرس ایس او پی تیا عملدرآمد نا بابت مچ آ ملک انا عالم دین ومشائخ عظام آتا سلابت اٹ اسیجائی اعلامیہ اس جاری کننگ اٹ و وزارت مذہبی امور مدرسہ غاتیٹی اسہ نصاب تعلیم نا مون آ دننگ، ملک آن مذہبی انتہاپسندی نا چٹفنگ تون اوار ایلو باندات آتیا امنائی سلاہ ودی کننگ کن عالم دین و مشائخ کونسل اس جوڑ کننگا ہرانا مسخت راج اٹ انتہاپسندی نا چٹفنگ و سگ ودی کننگ نا ءِ۔ دا کونسل نا رداٹ اِراخاص ءُ کمیٹی ہم جوڑ کننگا۔ اسہ کمیٹی مدرسہ غاتا نصاب تعلیم آن خارتس مواد آتا چٹفنگ و ملک اٹی ایلمی نا بابت سلاہ تا تیاری وخت اس کہ ایلو کمیٹی ملک اٹی فرقہ وارانہ ہم آہنگی ودی کننگ نا بابت سلاہ کروک گام گیج آتیا عملدرآمد ءِ پک کیک۔ وزارت مذہبی امور نا کنڈآن 12 ربیع الاول ءِ بنجائی دارالحکومت اٹ سیرت کانفرنس آتا اڈتننگ تون اوار اوار ملک انا ہرچار آ صوبہ غاتیٹی بین المذاہب ہم آہنگی ٹی گپ وتران نا کڑد انا بابت کانفرنس اڈ ترفنگا۔ وزارت مذہبی امور اقلیتی سکالرو طالب علم آتا وظیفہ غاتیکن فنڈزفارہم کرے۔ ننکانہ صاحب اٹی متروکہ وقف املاک بورڈ انا ڈغار نا متکن جھیڑہ ءِ ایسر کننگ اٹ ہم اہم کڑد ادا کرے۔ قرآن حکیم نا تعلیم ءِ لس کننگ و طالب علم آتا است بڈی ءِ کننگ کن 2018-19ء و 2019-20ء ٹی جہانی مقابلہ حسن و قرآت نا مقابلہ غاتیٹی پاکستانی چناتا بشخ ہلنگ ءِ پک کننگا۔ سیرت کانفرنس آتیٹی جہانی اسکالر آتے بٹنگ انگا۔ داکان بیدس وزارت مذہبی امور حج انا وخت آ سعودی وزارت حج اتون اواری اٹ پاکستان عازمین حج اکن روڈ ٹو مکہ ڈٹ ءِ عملی دروشم اس تننگ تون اوار چندی اہم گام گیج کرے۔ صدر مملکت ڈاکٹر عارف علوی ہم وزارت مذہبی امور نا خصوصی سرپرستیءِ کرے و چندی وارخواہی تیا ملک اٹی فرقہ وارانہ ہم آہنگی ودی کننگ وکورونا نا حالیت آتیٹی ایس او پی تا جوڑ کننگ نا بابت امنائی سلاہ ودی کننگ اٹ وزارت مذہبی امور نا خصوصی سرپرستی ءِ ہم کرے۔
