اسلام آباد۔ 18 اگست (اے پی پی) وزیراعظم نا خصوصی کمکار راجی رکھ و تخفیف نیزگاری پروگرام ڈاکٹر ثانیہ نشتر پارینے کہ نیزگاری نا برخلاف جہاد مدام وزیراعظم عمران خان نا اولیت آتیٹی اوار مسنے، 27 مارچ 2019ء آ مملکت پاکستان ءِ ریاست مدینہ نا اصول آتیا عمل کرسا اسہ آسرات ریاست اس جوڑ کننگ نا عزم انا درشانی ءِ کرسا وزیراعظم احساس پروگرام نا بنداو ءِ تخا، کوویڈ۔ 19 نا سوب آن لاک ڈاؤن اٹی زرگزرانی وڑاٹ زہمی تپہ ءِ ریلیف تننگ کن حکومت پاکستان لاک ڈاؤن نا اولیکو دہ دے اٹی 16.9 ملین حقدار خاہوت آتے اسہ وار نا مالی کمک وخت آ سرکننگ کن 203 بلین روپئی احساس ایمرجنسی کیش پروگرام کن جتا کننگا اگہ ملک اٹی عمومی فیملی سائز ءِ ہُننگے تو دا ملکی تاریخ نا غٹ آن بھلا راجی رکھ پروگرام ءِ، ہراڑآن کم و ود 109 ملین بندغ فائدہ ہرفیر، ہر حقدار اہل خاہوت ءِ 12000 روپئی نا مالی کمک فراوان کننگا۔ کوویڈ۔ 19 نا دین انا مشکل نا دا ساہت اٹ الس ءِ زوت آن زوت ریلیف تننگ کن احساس پروگرام نا ڈیجیٹل سسٹم ءِ کاریم اٹ اتنگا ہرا تدوک آ اسہ سال اٹی جوڑ کننگاسس۔ اوداخیال آتا درشانی ءِ سے شنبے نادے آ حکومت نا اِرا سال انا کارکڑد نا بارواٹ میڈیا تون گپ وتران کرسا کرے۔ اوپارے کہ راجی رکھ و تخفیف نیزگاری ڈویژن احساس پروگرام آ عملدرآمد کن ٹہیفنگانے، احساس تینا وڑنا اسٹ انگا و یکتا پروگرام ءِ ہر اپاکستان نا پدسلوک تپہ غاتا گچینی کن بناکننگانے۔ اوپارے کہ احساس نا یکتا خصوصیت اونا ودفنگ، پالیسی فارمیشن، گچین اسٹریٹجی، گورننس، مانیٹرنگ فریم ورک و بجٹ ءِ ہراقومی کہول انا فلاحی ڈٹ آتیا عملدرآمد کن تننگانے۔ اوپارے کہ احساس پاکستان اٹی تینا وڑنا یکتا پروگرام ءِ ہرا ملک انا لکھ آ نیزگار آتے نیزگاری نا ختم مفروک چکر آن کشسا ملک ءِ آسرات ریاست اس جوڑ کننگ نا کنڈآ اسہ گام اسے۔ اوپارے کہ تدوک آ 15 تُو اٹی احساس ءِ جہانی کہول آ ہم است بڈی دوئی مسنے، احساس نا سرسہبی نا بنداوی محرک غٹ راجی رکھ انا ڈٹ آتیٹی پوسکن آ ٹیکنالوجی آ جوڑ انفراسٹرکچر نا کاریم اٹ اتنگ ءِ۔ ڈاکٹر ثانیہ نشتر پارے کہ احساس پروگرام نا کمک اٹ ملک اٹی اولیکو وار حکومتی راجی رکھ انا ادارہ غاتا نیام اٹ کوآرڈینیشن و کمکاری نا بنداو ءِ تخنگا۔ احساس حکمت عملی 140 آن زیات پروگرام، پالیسی و گام گیج آتیا تالان ءِ، دا پاکستان نا راجی رکھ انا غٹ آن بھلا پروگرام ءِ ہرا نیزگار، چوری ، جنوزان، بے اُرا، معذور، بے روزگار، نیزگار، بزغر، ناجوڑ، ضرورت مند طالب علم، نیزگار نیاڑی و بزرگ آ شاری تا گچینی کن کاریم کننگ ءِ۔ اوپارے کہ تدوک آ 15 تُو اٹی ملک انا پدسلوک تپہ غاتا آسراتی کن چندی اہم گام گیج کننگانے ہرا راج انا نزور تپہ غاتا راجی آسراتی کن خاص وڑاٹ ترتیب تننگانے، احساس نا ہر پروگرام اٹی داہیت ءِ پک کننگانے کہ نیزگار و حقی حقدار بندغ آک داڑآن فائدہ ہرفر۔ اوپارے کہ احساس کفالت غیر مشروط مالی کمک نا پروگرام ءِ ہرانا کمک اٹ 70 لکھ بھاز نیزگار خاہوت (100%زالبول) آتے 2،000روپئی ماہانہ امداد و بچت بینک اکاؤنٹ نا آسراتی تننگک۔ پاکستان اٹی داخہ در بھلو کچ اسے ٹی ضرورت مند خاہوت آتا کفالت ءِ مہالو کننگتنے۔ دانا دنگ ءِ پین ودفنگ انگ ءِ۔ اوپارے کہ احساس بے سود وام، 42.65 ارب مالیت نا داپروگرام نا کمک اٹ چنکا کچ انا کاروبار کن ملک انا 100 پسماندہ ضلع غاتیٹی ضرورت مند بندغ آتے 80،000 روپئی نا بے سود وام تننگ انگ ءِ۔
