اسلام آباد۔ 18 اگست(اے پی پی)وزیر خارجہ مخدوم شاہ محمود قریشی پارینے کہ بھارت مدام پاکستان ءِ سفارتی تنیائی نا کنڈآ دِکہ تننگ نا کوشست کرے ہراٹی اودے بے سہبی مس، نن سنگت ملک آتون تعلقداری تے سوگو کننگ نا پالیسی اس جوڑ کرین، سویلی ایشیاء نا غٹ ملک آک بھارت نا ودیک است خواہی عزم انا گواچی ءُ، چین اتون شریداری ءِ اقتصادی شریداری ٹی بدل کننگ نا حکمت عملی اس جوڑ کننگانے، چین پاکستان نا متکن آ آزموندہ سنگت ءِ، راہداری نا ایلو مرحلہ ٹی نیزگاری نا چٹفنگ و کشاری شونداری ءِ اوار کننگا۔ اسیجائی مسخت آتا دوئی کننگ کن ہڑتوم آ ملک آتا تعلقداری تے پوسکن آ بڑزی تسکان دینہ۔ افریقی ملک آتون واپاری تعلقداری تا پوسکن آ دور بناکرینے، وزیراعظم عمران خان کورونا نا حالیت آتیٹی وام تیٹی ریلیف کن جہانی کہول آ توار بڑز کرینے، اینو مچ آ دنیا اوغان امن عمل اٹ پاکستان نا مثبت کڑد ءِ امنا کرینو، مچ آ دنیا اوغان ویل انا سیاسی ایسری ءِ اولیت تننگ ءُ ، اومیت ءِ دانا جوان ءُ بھرم اس دوئی مریک، ہر جہانی فورم آ پاکستان و کشمیر نا نقطہ نظر ءِ پیش کرینن۔ حکومتی کوشست آتے اٹ کشمیر نا ویل ءِ جہانی کہول آ پبی وڑاٹ تالان کننگا۔ وزیراعظم عمران خان اسلاموفوبیا نا ویل ءِ جہانی فورم تیا چست کرینے۔ سے شنبے نادے آ حکومت نا اِراسال انا کارکڑدنا بابت میڈیا تون گپ وتران کرسا وزیر خارجہ پارے کہ مستین حکومت پاکستان نا موقف ءِ جہانی کہول آ گچین وڑاٹ پیش کتو انتئے کہ ملک اٹی ہچ ءُ وزیر خارجہ اس الوکہ، ننے ہراتم حکومت رسینگا تو پاکستان سفارتی تنیائی نا گواچی ئس۔ ننا گچین سفارتی نمائندگی نا سوب آن پاکستان ءِ سفارتی تنیائی ٹی دِکہ تننگ نا تغ ءِ ہروک آ بھارت ءِ بے سہبی مس۔ اینو چین، نیپال، بنگلہ دیش تون اوار ایلو سویلی ایشیائی ملک آک بھارت آ سوج ہرفنگ ءُ۔ وزیر خارجہ پارے کہ نن وزیراعظم عمران خان نا وژن ءِ عملی دروشم اس تسن۔ وزیراعظم اسلاموفوبیا نا برخلاف اقوام متحدہ ٹی توار بڑزکرے۔ متنازع شہریت بل اٹ بھارت بنگالی تے دیمک اتون تشبیہ تس۔ نن ہمسایہ ملک آتون بے مٹ سنگتی ءِ زرگزرانی شریداری ٹی بدل کننگ خوانہ۔ چین نا بابت وزیر خارجہ پارے کہ چین اتون متکن آ تعلقداری تے نن پوسکن ءُ رخ اس تسن و بیجنگ تون سٹریٹجک پارٹنر شپ ءِ اکنامک سٹریٹجک شریداری ٹی بدل کننگ نا کوشست کرین۔ چین پاکستان نا متکن آ و آزموندہ سنگت ءِ۔ اوپارے کہ سی پیک نا ارٹ میکو مرحلہ ٹی بھاز انگا اہم ہدف آتے اوار کننگانے ہرافتےٹی صنعتی ری لوکیشن، نیزگاری نا چٹفنگ، انسانی وسیلہ و کشاری بشخ انا شونداری تون اوار ایلو بشخ آک اوار ءُ۔ نن ترکی و یورپی یونین تون واپاری و زرکاری تعلقداری تے مون آ درین و اِراسال اٹی یورپی یونین تون سٹریٹجک انگیجمنٹ پلان نا معاہدہ غا دستخط کرین۔ داکان بیدس اقتصادی سفارت کاری ءِ مون آدرین۔ اوپارے کہ وزیراعظم عمران خان نا پدتموک ملک آتا زرگزرانی بحالی کن ڈیٹ ریلیف سلاہ ءِ نن دنیا نا مون آ تخان، اوغان تنازعہ نا بابت وزیر خارجہ پارے کہ روس و امریکہ تون اوار دنیا اوغان ویل انا ایسری کن کھرب آ ڈالر خرچ کرے ولے ویل ءِ ایسر کننگ کتور، عمران خان نا موقف سہی پک مس کہ اوغانستان نا ویل ءِ واک اٹ ایسر کننگ مفک، اینو مچ آ دنیا اوغان ویل انا سیاسی ایسری ءِ اولیت تننگ ءُ۔ اوغان امن عمل اٹ پاکستان نا کمکاری ءِ بھلا واکدار آتون اوار مچ آ دنیا امنا کننگ ءِ۔
