اسلام آباد۔ 18 اگست (اے پی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر سیاسی مخالف آتیا پیدوار کرینے کہ کیپٹن کریز آ سلیسونے، عمران خان داسہ مرغن ءُ اِننگ اس گوازی کیک، وزیراعظم بھلا تنکی تیان پیش تمانے، عمران خان ایلوفتے اوار دننگ کن این آر او تننگ کن تیار اف کس اسے این آر او تفنہ۔ داخیال آتا درشانی ءِ او سے شنبے نادے آ حکومت نا اِراسال انا کارکڑد رپورٹ ءِ جاری کننگ نا وخت آ کرے۔ بنجائی وزیر پارے کہ عمران خان 22 سال انا جہد آن پد وزیراعظم جوڑ مس و اسہ مرغن ءُ اِننگ اس گوازی کننگ کن سنبرینگوک ءِ، داوخت آ پاکستان نا شمار ہمو ملک آتیٹی مننگ ءِ ہرا سرسہب حکمت عملی اٹ کورونا وائرس نا دین اتون گچین وڑاٹ مون تسنے۔ اوپارے کہ نیشنل کنٹرول اینڈ آپریشن سینٹر(این سی او سی) نا پلیٹ ارم آ سلابت اٹ فیصلہ کننگا، کورونا وائرس نا دین انا سوب آن زرگزران آدباؤبس۔ اسد عمر پارے کہ نن روزگار نا رکھ و مالی امداد نا وخت آ فراوانی کن گام گیج کرین، اسہ سوگو ءُ وڑاسے اٹ ملک انا سیاسی اکائی و تپہ غاتے اوار درین ، دین انا بابت غٹ فیصلہ غاتے تین پہ تینی سلابت اٹ کننگا۔ اسد عمر پارے کہ حکومت پک کرینے کہ ملکی فائدہ غاتیٹی غٹ ءِ اوار دینہ کانہ، نزور انگا تپہ غاتا کمک عمران خان نا مشن ءِ۔ عمران خان لاک ڈاؤن اٹ ہم نیزگار مخلوق ءِ زیات اہمیت تسنے۔ اسد عمر پارے کہ اگہ تدوک آ اِراہفتہ ٹی آبادی نا رداٹ ہُننگے تو پاکستان نا مقابلہ ٹی بنگلہ دیش اٹ کوویڈ۔ 19 آن مرک آتا کچ 4 گنا، بھارت اٹی 12 گنا و ایران اٹ 20 گنازیات ءِ۔ اوپارے کہ مارچ آن جولائی 2020ء ٹی پاکستان، بنگلہ دیش و بھارت نا برآمد آتا جاچ ءِ ہلنگے تو بنگلہ دیش نا برآمدآک 31 درسد وخت اس کہ بھارت نا 33 درسد و پاکستان نا برآمدآک 20 درسد کم مسنو۔ ہنداوڑ پاکستان ءِ اسہ تہائی کم زرگزرانی نسخان مسنے، کوروناوائرس آن زرگزران آن بیدس جان جوڑی نا بشخ ءِ ہم نسخان رسینگانے۔ اسد عمر پارے کہ اگہ پی ٹی آئی نا حکومت نا تدوک آ اِراسال اٹی نا کارکڑد نا جاچ ءِ ہلنگے تو وزیراعظم عمران خان نا پیدوار وژن نظر بریک کہ حکومت نا کاریم ملک انا نزور تپہ غاتا کمک ءِ کننگ نا ءِ۔ اوپارے کہ پاکستان کون آ ملک آتیٹی اشرافیہ منہ خاہوت آتا آسراتی کن فیصلہ سازی کیک ولے وزیراعظم اولیکو دے آن پیدوار پارت کریسس کہ نزور تپہ غاتے ریلیف تننگے ہرانا سوب آن حکومت نا اولیت الس نا ریلیف ئس۔ دا بابت وخت آ فیصلہ کننگا۔ اوپارے کہ کوروناوائرس نا دین آن زرگزران آ دباؤبس و داٹی حکومت گچین کارکڑد نا درشانی ءِ کرے و غٹ محکمہ و شریدارآک وخت آ گام گیج کریر انتئے کہ حکومت نا اولیت پسماندہ تپہ ئس۔ وپارے کہ حکومت مالیاتی نسخان نا سرسہبی اٹ مون ءِ تورینے۔ اسد عمر پارے کہ وزیر اعظم عمران خان آ دوبہ خلنگک کہ او ایلوتے اوار ہلسا کاریم کپک۔ اوپیدوار کرے کہ وزیراعظم این آر او ترسا ایلوفتے اسُل اوار ملفپک۔
