اسلام آباد۔ 18 اگست (اے پی پی) بنجائی وزیر صنعت و پیداوار حماد اظہر پارینے کہ کوویڈ۔ 19 نا دین انا سوب آن پاکستان تون اوار مچ آ دنیا نا صنعت و کاروبار زہمی مس ولے نن دین اٹی سپلائی چین ءِ بحال تخان تانکہ مارکیٹ اٹ ہچ وڑنا کاختی اس مف۔ حماد اظہر پارے کہ حکومت دین اٹی کاروبار، صنعت و تعمیرات نا بشخ آتے وخت آ ملا و کاروباری بشخ ءِ ریلیف تننگا ہرانا رداٹ 30 آن 35 لکھ ایس ایم ایز نا بجلی نا بل آتے بشخنگا ہراڑآن ملک انا گیشتر کاروبار فائدہ ہرفینو۔ اینخو مالی سال اکن حکومت نئے بیرہ خراج فری بجٹ اس تسنے بلکن مست آن ساڑی خراج آتا کچ ءِ ہم کم کننگانے، ہزار آ مصنوعات آتیا کسٹم ڈیوٹی ختم و سیلز خراج تون اوار ایلو خراج آتیٹی ہم آسراتی تننگانے، بنجائی حکومت تعمیرات نا بشخ اکن پیکج درستی راستی کرفینے ہراڑآن نئے بیرہ تعمیرات نا بشخ بلکن ذیلی صنعت آتیٹی ہم گچینی بسنے و بشام آن پد داٹی پین ودکی مریک۔ سے شنبے نادے آ حکومت نا اِراسال انا کارکڑد نا بارواٹ داڑےمیڈیا تون گپ وتران کرسا اوپارے کہ حکومت تدوک آ اِراسال اٹی اِرا پوسکن ءُ پالیسی درستی راستی کرفینے ہرافتے ٹی الیکٹرک وہیکلز و موبائل مینو فیکچرنگ نا پالیسیک اوار ءُ۔ حماد اظہر پارے کہ پاکستان تحریک انصاف نا حکومت نا اقتدار اٹ بننگ آن مست ملک اٹ کاریم اٹ اتوک آ موبائل فونز سمگل ئسرہ۔ حکومت 70 درسد کاریم اٹ اتوک آ سمارٹ فون تا اسمگلنگ نا مون ءِ تورینے، حکومتی خڑچ آتیٹی بچت و گچین انتظام کار کن حکومت نا پنچ ادارہ ایلو ادارہ غاتیٹی ضم یا ٹرانسفر کننگانو وخت اس کہ ایلو ادارہ غاتا اصلاحات نا عمل برجاءِ۔ اوپارے کہ مستین اٹی چندی بشخ آتے سرد خانہ ٹی شاغنگا ہرافتا اسہ درور اس پاکستان اسٹیل مل ءِ۔ اوپارے کہ تدوک آ پنچ سال اٹی پاکستان اسٹیل مل ءِ تنخواہ تا مد اٹ 35 ارب روپئی، بیل آؤٹ پیکج آتا رداٹ 80 ارب روپئی جاری کننگا اوکان پد ہم ادارہ غا 236 ارب روپئی نا وام ءُ۔ اوپارے کہ وزارت صنعت نجکاری کمیشن تون اواری اٹ پی ایس ایم نا بحالی نا گام گیج کننگ ءِ، حکومت کھد تیار کروک آاِراپلانٹ آتے فعال کرسا کھد انا نہاد اٹی کمتی کن گام گیج کرینے ہراڑآن حکومت ءِ ارب آ روپئی نا فائدہ مریک۔
