وزیراعظم عمران خان 1996ء ٹی پاکستان تحریک انصاف نا بنداو ءِ تخا، ملک و قوم انا شونداری و شونہالی ءِ نن تینا اولیت کرینن و ہندا بیانیہ ءِ ہلسا مون آ ہِننگ اُن، ریاست مدینہ نا مسہ بنداوی تمبہ رحم، انصاف و احساس ننا دفاعی ، زرگزرانی، دودوربیدہ ئی سرجزآتا احاطہ ءِ کیک
بنجائی وزیر حوالکاری و شینکاری سینیٹر شبلی فراز
اسلام آباد۔ 18 اگست (اے پی پی) بنجائی وزیر حوالکاری و شینکاری سینیٹر شبلی فراز پارینے کہ پاکستان نا الس نا مون آ 2 سال انا کارکڑد رپورٹ ءِ پیش کننگ اُن ہرا جمہوری حکومت نا طرز عمل مریک، وزیراعظم عمران خان 1996ء ٹی پاکستان تحریک انصاف نا بنداو ءِ تخا، دانا وت چپ و راست انا جاگہ غا سہی و غلط کرے، اسہ کنڈآ جند انا فائدہ غاک و ایلو کنڈآ ملک و قوم انا شونداری، شونہالی نا بنداوی مسخت آتا دوئی کننگ ءِہرافتے نن تینا اولیت کرینن و ہندا بیانیہ ءِ ہلسا مون آ ہِننگ اُن، ریاست مدینہ نا مسہ بنداوی تمبہ رحم، انصاف و احساس ننا دفاعی، زرگزرانی، دودوربیدہ ئی سرجزآتا احاطہ ءِ کیرہ، پاکستان نا الس جند انا فائدہ غاتا بیانیہ ءِ مسترد کرینے ، ننا مسخت جند انا سرسہبی تا تشہیر اف بلکن تہہ و پیشن نا پڑتیا دشمن نا عزم انا برخلاف جنگ کننگ نا ءِ، دشمن مدام ننا زرگزران ءِ نسخان ترسانااومیتی و ہڑدڑ تالان کننگ خواہسونے، ووزارت حوالکاری دا جنگ انا پبی مقابلہ ءِ کیک، حکومت نا پبی جہد اٹ سخت انگا وخت گدرینگا جوان انگا وخت بناکرینے۔ داخیال آتا درشانی ءِ او سے شنبے نادے آ پاکستان تحریک انصاف نا ساڑی حکومت نا 2 سال انا پورو مننگ نا وخت آ وزیر خارجہ شاہ محمود قریشی، بنجائی وزیر ڈٹ بندی شونداری و اصلاحات اسد عمر، بنجائی وزیر صنعت و پیداوار حماد اظہر، سلاہکار خزانہ ڈاکٹر عبدالحفیظ شیخ، وزیراعظم نا خصوصی کمکار تخفیف نیزگاری ڈاکٹر ثانیہ نشتر تون اوار پی آئی ڈی ٹی پریس کانفرنس آن تران کرسا کرے۔ اوپارے کہ 2 سال انا کارکڑد ءِ پیش کننگ جمہوری حکومت نا طرز عمل مریک و داننے موقع فراوان کیک کہ نن تینے تینا مستین تون گنڈن، داملک انت اکن جوڑ مس و ہمو مخلوق ہرافک ملک انا تخلیق نا سوچ ءِ علامہ اقبال و خطبہ آلہ آباد تون گنڈار، او سمجھارہ کہ متحدہ ہندوستان اٹ مسلمان تا سیاسی، دودوربیدہ ئی و مذہبی آخبت انت مننگ کیک۔ اوپارے کہ جغرافیائی وڑاٹ نن ملک ءِ دوئی کرین ولے دا اصول آتیانن تینا ماڑی تے تفنگ کتون، ننے دا اصول آتون منسلک مروئی تمک۔ اوپارے کہ 1996ء ٹی پاکستان تحریک انصاف جوڑ مس و عمران خان’’ایاک نعبد و ایاک نستعین‘‘ نا بنداو آ تینا جماعت ءِ جوڑ کرے و چپ و راست انا سیاست نا جاگہ غا درست و غلط انا بنداو آ سیاست ءِ وت جوڑ کرے و ہندابیانیہ ءِ ہلسا مون آ ہِننگ اُن۔ اوپارے کہ مستین حکمران تا اسہ کنڈآ جند انا فائدہ غاک ءُ و ایلو کنڈآ ملک و قوم انا شونداری و شونہالی نا بنداوی مسخت آتا دوئی کننگ ءِ و نن دادے تینا اولیت کرینن۔ سینیٹر شبلی فراز پارے کہ وزیراعظم عمران خان نیزگار پرور و خواری کش شخصیت اسے، اونا بنداوی سوچ ءِ کہ ملک ءِ ہراوڑ مون آ دننگے، ملک اٹ انصاف و میرٹ نا بالادستی مرے۔ اوپارے کہ ریاست مدینہ نا مسہ بنداوی تمبہ رحم، انصاف و احساس ءِ تینا دفاعی، زرگزرانی و دودوربیدہ ئی سرجزآتا وت جوڑ کرینن۔ وزیر حوالکاری پارے کہ ففتھ جنریشن وارچلینگ انگ ءِ و داوخت آ ملک ءِ تہہ و پیشن نا پڑتیا چیلنج مون تروک ءِ، دشمن مدام ننا زرگزران ءِ نسخان ترسا نااومیتی و ہڑدڑ ودی کننگ خواہسونے و دا چرجوئی ٹی میڈیا و خاص وڑاٹ وزارت حوالکاری نا کڑد ودک۔ وزارت حوالکاری و شینکاری تینا کڑد ءِ پبی وڑاٹ پورو کیک و دا پڑتیا ڈٹ کر مقابلہ ءِ کیک۔ بنجائی وزیر پارے کہ ڈیجیٹل میڈیا نا دور اٹی ہر شاری صحافی اس جوڑ مسنے و ہر صحافی، ہر شاری و ہر وزیر ءِ داجنگ ءِ اواری اٹ کروئی ءِ و سرسہبی ننا مقدر مریک۔ نن داٹی ہچ ءُ تقسیم اس خواپنہ۔ وزیر حوالکاری پارے کہ حکومت نا پبی جہد اٹ سخت انگا وخت گدرینگاگچین آ وخت بناکرینے۔ داوخت آ غٹ وزیر آک تینا تینا بشخ انا 2 سال انا کارکڑد ءِ مون آ تخار۔
