اسلام آباد۔ 18 اگست (اے پی پی) پاکستان تحریک انصاف نا حکومت اقتدار اٹی بننگ آن پد ادارہ غاتیٹی چندر مہم نا بناءِ کرےو ادارہ غاتیٹی خڑچ آتے کم کرے، دارداٹ پاکستان پوسٹ ہم ہمووخت آن ادارہ ٹی خڑچ آتے کم کرے و ادارہ ٹی گچین حکمت عملی نا رداٹ گام گیج کرسا اودے نئے بیرہ مالی نسخان آن کشا بلکن بنجائی وزیر پوسٹل سروسز مراد سعید نا جند انا کوشست آتے اٹ پاکستان پوسٹ تینا نت تیا سلنگ تون اوار اوار اسہ کٹیا کروک ادارہ سے نا وڑاٹ مون آ بسنے۔ پاکستان پوسٹ ہراکہ پی ٹی آئی حکومت نا بننگ آن مست مالی نسخان نا گواچی اسہ بے جان ادارہ اس جوڑ مسوسس، ساڑی حکومت اٹ اِرا سال اٹی دے و نن ءِ اسٹ کرسا دا اہم قومی ادارہ ءِ اسہ فعال السی خذمت آن سرشار و پوسکن آ دورانا خواست آتون ہم گرنچ قومی ادارہ اس جوڑ مرسا الس نا ہنوک آ پت ءِ بحال کرینے۔ پاکستان پوسٹ ءِ کٹیا کروک ادارہ اس جوڑ کننگ کن چندی اہم گام گیج کرے ہرافتا رداٹ پوسٹ مناسب خڑچ آ صارف آتے اوفتا درگہ غا میل، زر و گڑاتا رکھ و وخت آ فراوانی، الیکٹرانک منی آرڈر(ای ایم او) ڈور سٹیپ سروس، بنائی وڑاٹ ای ایم او ءِ جنرل پوسٹ آفس(جی پی اوز) اٹی ونڈوز نا زرتس اکن پیش کننگا ہرا پوسٹ ٹو پوسٹ نا پن اٹ چاہنگاکہ۔ داسہ پاکستان پوسٹ ای ایم او سروس پیش کننگ ءِ ہرادے پوسٹ ٹو ڈور سٹیپ پاننگک، پاکستان پوسٹ فرد و کاروباری بندغ آتیکن مواصلاتی رابطہ نا فراوانی آن ایڑترمرسا بدل مروک آ مواصلات نا منڈی ءِ مون آ دننگ کن اسہ بھلو و متنوع کڑد ادا کننگ ءِ، پاکستان پوسٹ روایتی وڑاٹ دادے تینا بنداوی پوسٹل بزنس پہہ مننگ آن مون آ ہِننگ کن پوسکن آ مواصلات و انفارمیشن ٹیکنالوجی نا کاریم اٹ اتنگ آ زور شاغنگ ءِ۔ پاکستان پوسٹ شاپ است خواہی ہلوک آ ای کامرس شریدار آتے پوسٹل کاؤنٹرآتا کمک اٹ تینا مصنوعات آتا آن لائن بہاکننگ کن کمکاری نا سلہ خلکونے داآسراتی آن ورناپوریاگرتے پلیٹ فارم اس دُوبریک ہرانا کمک اٹ او بے کچ کم خڑچ آ تینا کاروبار ءِ مون آ دننگ کیرہ۔ دا سروس اینخو سال فروری نا اول اٹ پاکستان پوسٹ انا ای کامرس گام گیج آتا رداٹ بناکننگا۔ پاک پوسٹ شاپ انا رداٹ ورناپوریاگر و خوردہ فروش آتے پاکستان پوسٹ کاروبار آسراتی آن فائدہ ہرفنگ کن شریداری نا وارخواہی پیش کننگ ءِ۔ پاک پوسٹ تون انفراسٹرکچر و ترسیل و رسد نا نیٹ ورک اس ارے، بھاز انگا جہانی ویب پورٹلل آپریٹر آک ہم پاکستان پوسٹ اتون بطور ڈیلیوری پارٹنر پاکستانی مارکیٹ اٹ کاروبار نا است خواہی ظاہر کرینو ہراڑآن داادارہ پین شون ہلیک۔ حکومت نا اِراسال انا کارکڑد انا بابت پاکستان پوسٹ انا ترجمان اے پی پی ءِ پارے کہ ساڑی حکومت نا گچین گام گیج آتا سوب آن دا ادارہ داسہ شونداری نا کنڈآ ہِننگ ءِ۔ اوپارے کہ وزیراعظم نا وژن نا رداٹ بنجائی وزیر مراد سعید نا پارت آ پاکستان پوسٹ ادارہ ٹی خڑچ آتے کم کرے و ادارہ ءِ پوسکن آ وڑوڈول آتیا اتنگ کن کاریم نا بناءِ کننگا ہرانا سوب آن پاکستان ہرا مہالو مالی تنکی نا گواچی ادارہ اس ئس داسہ کٹیا کروک ادارہ سے نا وڑاٹ مون آ بسنے۔ ترجمان پارے کہ تدوک آ اِرسال اٹی حکومت کیہی اہم گام گیج کرے ہرافتا سوب آن داادارہ شون ہلکونے ہرانا رداٹ پاکستان پوسٹ موبائل ایپلی کیشن (ایپ) ءِ درستی راستی کرفے ہرادے اسہ لکھ آن زیات صارف ڈاؤن لوڈ کرینو ہرا صارف آک تینا اینڈرائڈ موبائل ڈیوائس نا کمک اٹ تینا چھٹی تے آن لائن ٹریک و ٹریس کننگ اٹ کاریم اٹ اتنگ کیرہ۔ ترجمان پارے کہ پاکستان پوسٹ صارف آتا لائخی تے ودفنگ و نظام ءِ آخبتی وڑاٹ گچین کننگ کن تینا غٹ غاوتے دا موبائل ایپ انا کمک اٹ کیرہ۔ دادرخواست اٹی چندی خصوصیت ارے ہراسروس آتا گیشتر صف آتے کاریم اٹ اتیرہ۔ اوپارے کہ پاکستان پوسٹ مہالو آن دا آفرءِ تسنے دُن کہ ٹریک اینڈ ٹریس، غاوتا ہینڈلنگ، ای کامرس، پارسل وصولی، ترسیل، غاو، پوسٹ آفس نا ہند، ٹیرف، پوسٹ کوڈ و پوسٹل سروس آتا بارواٹ معلومداری اوار ءِ۔ ایپ ءِ کاریم اٹ اتسا گراک تینا سفر اٹی تینا پارسل ءِ ٹریک کننگ کیرہ و داباوری تون غاودرج کرفنگ کیرہ کہ اودے جوان وڑاٹ ایسر کننگک۔ ترجمان پارے کہ پاکستان پوسٹ آن لائن ای شاپ انا کمک اٹ 1770 شریدار آتا رجسٹریشن ءِ کرینے، ہراخذمت آتا سیلز، وصولی و پدی تننگ نا سروسز، کاؤنٹر بکنگ تون اوار ایلو آسراتی تے فراوان کیرہ۔ اوپارے کہ بھاز انگا جہانی ویب پورٹل آپریٹرآک دابابت نن تون شریداری ٹی تینا است خواہی ءِ ظاہر کرینو۔
