ہڑتوم آ کنڈآتا تعلقداری تتون اوار اہم باندات آتیا گپ وتران
اسلام آباد۔ 17 اگست (اے پی پی) چیئرمین سینیٹ محمد صادق سنجرانی پارینے کہ پاکستان اسرائیل ءِ اسُل امنا کننگ کپک، سعودی عرب و پاکستان نا نیام اٹ ایلمی تعلقداری ءِ، ہرسخت انگا وخت اٹی ہڑتوم آ ملک آک اسہ ایلو تون تفینو، ہڑتوم آ ملک آک مدام جہانی باندات و ویل آتیا سلابت اٹ کاریم کیرہ۔ سینیٹ سیکرٹریٹ نا رداٹ داخیال آتا درشانی ءِ او دوشنبے نادے آ سعودی عرب نا سفیر تون پارلیمنٹ ہاؤس اٹی اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری تتون اوار اہم باندات آتیا گپ وتران مس و چیئرمین سینیٹ نا کنڈآن سعودی عرب نا بادشاہ شاہ عبداللہ و ولی عہد شہزادہ محمد بن سلمان کن نیک است خواہی تا درشانی ءِ کرے۔ اوڑدہی ٹی چیئرمین سینیٹ پارے کہ ہڑتوم آ ملک آتا نیام اٹ ایلمی تعلقداری ءِ۔ ہرسخت انگا وخت اٹی ہڑتوم آ ملک آک اسہ ایلو تون تفینو۔ اوپارے کہ ہڑتوم آ ملک آک مدام جہانی باندات و ویل آتیا سلابت اٹ کاریم کیرہ۔ صادق سنجرانی پارے کہ پاکستان اسرائیل ءِ اسُل امنا کپک۔ اسرائیل نا بابت متحدہ عرب امارات نا فیصلہ نا جوان ءُ بھرم اس مریک۔ پارلیمنٹ خاص وڑاٹ ایوان بالا نا کنڈآن دا عزم انا درشانی ءِ کینہ کہ حرمین شریفین نا رکھ کن ہروڑنا قربانی تننگک۔ اوپارے کہ سعودی عرب نا کنڈآن ہر سخت انگا وخت اٹی پاکستان تون سلنگ ءِ اسُل است آن دننگ کپنہ۔ اوپارے کہ اومیت کینہ کہ سعودی عرب ہم ہندا جوزہ اٹ کمکاری ءِ برجاتخک۔
