اسلام آباد۔ 17 اگست (اے پی پی) تدوک آ مالی سال 2019-20ء ٹی ڈیہہ نا ملک آتے کروک آ برآمد آتیٹی 24 درسد کمتی مسنے، برآمد آتیٹی کمتی نا بنداوی سوب مارچ 2020ء ٹی کوروناوائرس نا تالانی نا مون ءِ توننگ کن خلوک آ لاک ڈاؤن ءِ۔ اسٹیٹ بینک آف پاکستان (ایس بی پی) نا حساب وکتاب نارداٹ تدوک آ مالی سال اٹی ڈیہہ نا ملک اوغانستان، چین، بنگلہ دیش، سری لنکا، بھارت، ایران، نیپال، بھوٹان ومالدیپ ءِ کروک آ قومی برآمدات 3.738ارب ڈالر اسکان کم مسر وخت اس کہ مالی سال 2018-19ء ٹی برآمد آتا کچ 4.678ارب ڈالر مسوسس۔ ہنداوڑ مالی سال 2019ء نا مقابلہ ٹی تدوک آ مالی سال 2020ء ٹی ہمسایہ ملک آتے کروک آ برآمد آتیٹی 92 کروڑ ڈالر یعنی 24 درسد نا کمتی ریکارڈ کننگانے۔ ایلو کنڈآ درآمد آتیٹی کمتی نا سوب آن ہمسایہ ملک آتون کروک آ واپار نا نسخان اٹی ہم کمتی مسنے۔ ایس بی پی نا رداٹ مالی سال اٹی اوغانستان ءِ کروک آ برآمدات25.5درسد نا کمتی آن 1.192ارب ڈالر نا مقابلہ ٹی 888.913ملین ڈالر اسکان کم مسر۔ ہنداوڑ چین ءِ کروک آ برآمد آک ہم 10.5 درسد کم مسر و تدوک آ مالی سال 2020ء ٹی برآمد آتا کچ 1.663ارب ڈالر اسکان کم مسر وخت اس کہ مالی سال 2019ء ٹی چین ءِ 1.858ارب ڈالر نا برآمد کننگاسس۔ اسٹیٹ بینک انا رداٹ تدوک آ مالی سال اٹی بھارت ءِ کروک آ قومی برآمد آتیٹی غٹ آن زیات 90.8 درسد نا کمتی ریکارڈ کننگانے۔ مالی سال 2019ء ٹی بھارت ءِ 311.958ملین ڈالر نا برآمد کننگاسس ہراتدوک آ مالی سال 2020ء ٹی 28.644 ملین ڈالر اسکان کم مسر۔ ہنداوڑ ایران ءِ کروک آبرآمدات 2.942ملین ڈالر نا مقابلہ ٹی 0.055ملین ڈالر اسکان کم مسر وخت اس کہ بنگلہ دیش ءِ کروک آ برآمد آتا کچ ہم 6.79درسد نا کمتی اتون 744.720ملین ڈالر نا مقابلہ ٹی 694.124ملین ڈالر اسکان کم مس۔ داکان بیدس سری لنکا ءِ کروک آ برآمد آتیٹی تدوک آ مالی سال اٹی 5.49درسد کمتی ریکارڈ کننگانے و برآمد آتا کچ 303.761ملین ڈالر نا مقابلہ ٹی 287.941ملین ڈالر اسکان کم مس۔ ارٹ میکو کنڈآ نیپال ءِ کروک آ ملکی برآمدات تدوک آ مالی سال اٹی 86.7درسد ودکی اتون 21.679ملین ڈالر اسکان سرمسر وخت اس کہ مالی سال 2019ء ٹی نیپال ءِ 2.872 ملین ڈالر نا برآمد کننگاسس وخت اس کہ مالدیپ ءِ کروک آ برآمد آک ہم 37.36درسد ودکی اتون 6.172 ملین ڈالر نا مقابلہ ٹی 8.478 ملین ڈالر اسکان ودار۔ ہنداوڑ تدوک آ مالی سال اٹی ہمسایہ ملک آتے کروک آ قومی برآمدآتیٹی جم وڑاٹ 24 درسد کمتی ریکارڈ کننگانے۔

متعلقہ مضامینمصنف کی طرف سے مزید