اسلام آباد۔ 17 اگست (اے پی پی) جہانی مالیاتی فنڈز(آئی ایم ایف) پارینے کہ کوویڈ۔ 19 نا زرگزرانی خڑچ آتے کم کننگ کن پاکستانی بینک آک جاری کروک وام تا 624 ارب روپئی اصل زر انا ہلنگ ءِ اسہ سال اسے کن پد بٹینو۔ وام تا ہلنگ اٹ رعایت پاکستان اٹی بینکاری نا بشخ انا سوگوی نا عکاسی ءِ کیک۔ آئی ایم ایف نا ’’پالیسی ایکشن ٹیکن بائی کنٹریز‘‘ حوال نا رداٹ جہانی ادارہ پاکستان نا کنڈآن کورونا دَین انا تنکی تون مون تننگ نا بابت کروک آ چندی گام گیج آتا جاچ ءِ ہلنگ آن پد پارینے کہ جہانی دین انا سوب آن تدوک آ مالی سال اٹی زرگزرانی شرح نمو منفی 0.4 درسد مسنے ولے اینخو مالی سال اٹی زرگزرانی بحالی نا گمان ءِ۔ حوال اٹی پاننگانے کہ پاکستان نا مرکزی بینک شرح سود اٹی کمتی اتون اوار اوار بے روزگار نا مون ءِ توننگ، کاروبار و صنعتی بشخ انا بحالی کن جامع گام گیج کرینے۔ ہرافتے ٹی کوویڈ۔ 19 تون مون تننگ و جان جوڑی نا بشخ اکن آسان شڑت آتیا 19 ہسپتال آتے 6 ارب روپئی و مینوفیکچرنگ نا بشخ اٹی زرکاری ءِ مون آ دننگ کن 52 پوسکن آ ڈٹ آتیکن 22ارب روپئی نا وام تیان بیدس 2200 ادارہ غاتے ٹی کاریم کروک آ کارندہ غاتا رکھ اکن تنخواہ تا زرتس انا مد اٹی کم شرح سود آ 138 ارب روپئی نا وام فراوان کرینے۔ داکان بیدس اسٹیٹ بینک آف پاکستان نا کنڈآن جاری پارت آتا رداٹ بینک آک مست آن جاری کروک وام تا اصل زر انا پدی تننگ نا مد اٹ 624 ارب روپئی نا ہلنگ ءِ اسہ سال اکن پد بٹینو ہراڑآن پاکستان نا بینکاری نا بشخ انا سوگوی نا عکاسی مریک۔
