اسلام آباد۔ 14 اگست (اے پی پی) صدر مملکت ڈاکٹر عارف علوی کشمیری تا بدل مفروک مخ تفی ءِ کننگ نا درشانی ءِ کرسا پارینے کہ مقبوضہ کشمیر نا الس ءِ تنیا الیپنہ، اوفتا اخلاقی ، سیاسی و سفارتی مخ تفی ءِ برجاتخنہ، پاکستان نا سرسہب سفارتکاری نا سوب آن اقوام متحدہ نا سیکرٹری جنرل، انسانی حق انا جہانی تنظیمک،چین، ترکی و سعودی عرب تون اوار ایلو سنگت ملک آک کشمیر نا ویل آ پاکستان نا موقف نا مخ تفی ءِ کرینو، سلہہ بند فوج و پاکستانی قوم دہشت گردی نا نرزوری اٹ مقابلہ ءِ کریر ہراڑآاوفتے خراج تحسین پیش کیوہ، اوغانستان اٹی امن کن امن معاہدہ اہم ءُ گام اسے، پاکستان اوغانستان اٹی امن نا خواہندار ءِ۔ سی پیک آن ڈیہہ ٹی شونداری و شونہالی نا پوسکن آ دور بناکرینے، کورونا غان پد ہم پاکستان نا زرگزرانی ٹک آک مثبت کنڈآ ہِننگ ءُ۔ حکومت نا پامدار پالیسی و قوم انا کمک اٹ کورونا دین انا برخلاف سرسہبی ملا۔ تدوک آ اِرا سال اٹی حکومت و قوم وڈی خوری نا برخلاف علم بڑزکرے۔ داخیال آتا درشانی ءِ او 73 می یوم جشن آزادی نا مرکزی دود آن تران کرسا کرے۔ اوپارے کہ قوم ءِ 73 می یوم آزادی نا مبارکباد پیش کیوہ۔ 23 مارچ1940ء آ مسلمانک قرارداد مسخت اس پاس کریر، اواسہ تغ اس ئس ہرا 14 اگست 1947 آ پورو مس۔ پاکستان مریس جہد آن پد دوئی کننگا اوکان پد پاکستان نا پوروی کن داملک ءِ خواجہ محمد خاتم النبین صلی اللہ علیہ و آلہ وسلم نا سنت، علامہ اقبال و قائد اعظم نا تغ تا رداٹ جوڑ کننگ نا جہد بناکرے۔ دا جہد اینو ہم برجاءِ۔ اوپارے کہ ملک ءِ جوڑ مننگ آن پد چندی چیلنج آک مون تروک ئسر۔ سلہہ بند فوج و قوم دہشت گردی نا نرزوری اٹ مقابلہ ءِ کریر ہراڑآ اوفتے خراج تحسین پیش کیوہ۔ پاکستان ہراوڑ دہشت گردی نا مقابلہ ءِ کریر پین اسہ ملک اس ہم کننگ کتنے۔ اوپارے کہ پاکستان 35 لکھ اوغان باہوٹ آتا مہمانداری ءِ کرے۔ ہچ کس اوفتا برخلاف ہیت کتو۔ داسہ ہم 27 لکھ اوغان پردیسی پاکستان اٹ ساڑی ءُ وخت اس کہ ایلو کنڈآ دیکی ملک آک 100 بندغ ءِ ہم جاگہ تننگ کن تیار افس۔ اوپارے کہ قوم قائد اعظم محمد علی جناح نا فرمان سیوت، اسٹی و ایمان آ عمل کریر۔ انتہاپسندی نا چٹفنگ کن قوم سیوت نا درشانی ءِ کریر۔ اوپارے کہ بھارت نا پاکستان آ جلہو نا ورندی ٹی پاکستان امن نا کلہو ءِ تس۔ پاکستانی حکومت، قوم ومیڈیا ہم امن نا کلہو ءِ تسر وخت اس کہ بھارتی حکومت، قوم ومیڈیا جنگ ءِ تہو تسر ۔مچ آ دنیا ٹی لاک ڈاؤن خلنگا ولے وزیراعظم عمران خان قوم انا فکر ءِ کرسا پارے کہ نن داخہ سخت لاک ڈاؤن کننگ کپنہ ہراڑآن مخلوق بین و افلاس نا گواچی مرے۔ دا وزیراعظم نا تینا ملک انا الس تون ہمدردی نا درشانی ئس۔ او ملک و قوم انا فائدہ ٹی مشکل کسرءِ گچین کرے ہراڑآ وزیراعظم ءِ خراج تحسین پیش کیوہ۔
