پاکستان ءِ اسلامی فلاحی ریاست اس جوڑ کننگک، زرگزران نا حالیت آک گچین مننگ نا بناءِ کرینو، داسہ صنعت و الس کن اڑزآن بجلی دستیاب مریک، وزیراعظم نا یوم آزادی نا وخت آ پی ٹی وی آ خصوصی کلہو
اسلام آباد۔ 14 اگست (اے پی پی) وزیراعظم عمران خان قوم ءِ 74 می یوم آزادی آ مبارکباد ترسا پارینے کہ پاکستان ءِ اسلامی فلاحی ریاست اس جوڑ کننگک، زرگزران نا حالیت آک گچین مننگ نا بناءِ کرینو۔ و کورونا نا کیس آک ہم کم مسنو، اسٹاک مارکیٹ ریکارڈ بڑزاہنانے، تعمیرات و اوڑتون گنڈوک صنعت آتے تاریخی پیکج تسن ہراڑآن روزگار نا وارخواہی ودی مس و خراج وصولی ہم گچین مس۔ انشاء اللہ حالیت آک پین گچین مرسا کارہ۔ پاور کمپنی تتون مریس مذاکرات آن پد معاہدہ مسنے،داسہ صنعت و الس کن اڑزآن بجلی دستیاب مریک، مچ آ پاکستان کشمیری تتون تفوک ءِ، اوفتا حق اکن دعا ہم کننگ ءُ و جہد ہم کیرہ۔ جمعہ نادے آ پاکستان ٹیلی ویژن آ قوم انا پن تینا کلہو اٹی وزیراعظم عمران خان پارے کہ پاکستان قائد اعظم محمد علی جناح و علامہ اقبال نا عظیم تغ تا تعبیر ءِ۔ او پاکستان ءِ اسلامی فلاحی ریاست اس جوڑ کننگ خوائسرہ ہراٹی کانود نا بالادستی مرے۔ غٹ انسان تے بریبر حق دوئی مرے و ریاست اوفتا حق انا ضمانت ءِ ایتے۔ وزیراعظم پارے کہ نن دا سفر نا کنڈآن ہِننگ اُن و جہد نا کمک اٹ مزل آ سرمرسا دم ہلون۔ وزیراعظم پارے کہ اینو قوم ءِ کورونا وائرس نا اواری اٹ مقابلہ ءِ کننگ آ ہم مبارکبادی ایتیوہ۔ پاکستان ہراوڑ کورونا وائرس نا برخلاف جہد کرینے شاہد قوم اسے ٹی داوڑ نا درور ملنگ کے۔ ننے گڑتی ئس کہ کوروناوائرس نا سوب اسہ کنڈآ مخلوق ناجوڑی آن زوال کیرہ و ایلو کنڈآ زرگزران تباہ حال مننگ نا سوب آن بین آن کہیرہ ولے اللہ تعالیٰ نا خاص شکرو کرم ءِ کہ کورونا کیس آتیٹی ہم کمتی بسنے و زرگزران ہم گچینی نا کنڈآ ہنانے۔ اوپارے کہ انسان کوشست کیک و اللہ تعالیٰ سرسہبی ایتک۔ وزیراعظم الس آ زور شاغاکہ او احتیاط کننگ ءِ ہلیپس و ماسک آتے کاریم اٹ اتیر انتئے کہ دا دین آن بچنگ کن داغٹ آن المی ءُ۔ وزیراعظم پارے کہ ای قوم ءِ مسٹ میکو مبارکباد زرگزران نا حالیت آتا گچین مننگ آ ایتنگ خواوہ۔ اوپارے کہ اِراسال بھاز مشکل اٹ گدرینگار۔ ہراتم نن اقتدار ءِ سنبھالان تو بھاز مشکل حالیت آتا مون تروک ئس۔ ننے وام تا قسط آتے تروئی ئس۔ نن تون فارن ایکسچینج الوکہ و نن ڈیفالٹ کرینہ۔ اگہ نن خوانخواستہ ڈیفالٹ کرینہ تو دانا بھاز خراب زہم آتون مون تروئی تماکہ انتئے کہ ڈیفالٹ کننگ آن ڈالر بننگ بند مریک و روپئی نا قدر تماکہ ہراڑآن گڑاک کبین مریرہ۔ اللہ نا شکرءِ کہ نن ڈیفالٹ آن رکھ مرسا بھاز خراب ءُ کبینی سے آن بچانن۔ وزیراعظم پارے کہ دُن تو الس کن داسہ ہم مشکل حالیت ولے حالیت آک داسہ گچین مننگ ءُ۔ اسٹاک مارکیٹ ریکارڈ بڑزآ ہنانے۔ مخلوق نا پت ودنگ نا بناءِ کرینے۔ ننا حکومت تعمیراتی بشخ ءِ ہمو آسراتی تے تسنے ہرافتے مہالو ہچ اس تتنے۔ 40 آن زیات صںعت تعمیرات نا بشخ اتون گنڈوک ءُ۔ تعمیرات نا بشخ ءِ آسودہی تننگ آن داصنعت آتے ہم شونداری مننگءِ و روزگار ملنگ بناکرینے۔
