اسلام آباد۔ 14 اگست (اے پی پی) وزیراعظم عمران خان قوم ءِ آزادی نا 73 سال پورو مننگ آ مبارکباد ترسا پارینے کہ قائد اعظم نا پاکستان نا کنڈآ ننا سفر بناکرینے، دا ہندن ءُ پاکستان اس مریک ہراڑے غٹ شاریک کانود نا نظر اٹ بریبر مریرہ، کانود غٹ اکن مریک و پاکستان اسہ اسلامی فلاحی ریاست اس مریک۔ جمعہ نادے آ تینا ٹویٹ آتیٹی وزیراعظم عمران خان پارے کہ ای قوم ءِ دا ہیت آہم مبارکبادی ایتیوہ کہ مستین نا حکومت آتیان توانائی نا بشخ ہراننے میرات اٹ تباہ حال ملاٹی گچینی اتنگ اُن۔ اوپارے کہ مریس مذاکرات آن پد نن آئی پی پیز تون اسہ پوسکن ءُ معاہدہ اس کرینن ہراڑآن بجلی نا نہاد ہم کم مریک و گردشی وام تا ویل ہم ایسر مریک۔ اوپارے کہ ننا مون آ ہدف بجلی نا بشخنگ نا نظام اٹ اصلاحات اتنگ نا ءِ۔ وزیراعظم کشمیر اٹی ایڑھ، ایلم تا پن کلہو اٹی پارے کہ مچ آ پاکستانی قوم حق خودارادیت نا جہد اٹ اوفتے تون تفوک ءُ۔ بھارت نا غیر کانودی کوزہ و ظالمانہ گام گیج آتا برخلاف نن تینا کشمیری ایلم و ایڑھ تا ہروڑاٹ مخ تفی ءِ برجاتخنہ۔ وزیراعظم عمران خان قوم ءِ کوروناوائرس نا سرسہبی اٹ مقابلہ ءِ کننگ آ ہم مبارکبادی تس۔ اوپارے کہ ننا حکومت نئے سمارٹ لاک ڈاؤن و نغد امداد نا پروگرام تا کمک اٹ نیزگار الس ءِ لنگڑی آن کہینگ آن بچفے بلکن حکومت نا گچین حکمت عملی نا سوب کورونا نا کیس آتیٹی ہم کمتی بسنے۔ وزیراعظم پارے کہ ای قوم ءِ اِراسال نا پبی جہد آن پد زرگزران نا حالیت آتیٹی گچینی آہم مبارکبادی ایتیوہ۔ اوپارے کہ کرنٹ اکاؤنٹ و مالیاتی نسخان اٹی کمتی بسنے۔ تعمیرات و داڑتون وابستہ بشخ آتا ملنگ آن روزگار نا وارخواہی ہم ودنگ ءِ۔ اسٹاک مارکیٹ بڑزآ ہِننگ ءِ۔ سیمنٹ و کارتا بہاکننگ اٹ ودکی مسنے و برآمدات و خراج کٹیا گچین مسنے۔ دا گڑاک زرگزرانی حالیت آتیٹی گچینی نا عکاس ءُ۔
