اسلام آباد ۔ 13اگست (اے پی پی) منصوبہ بندی ءُ دیمروئی ، مٹءُ بدلی ءُ حاسیں گامگیج ءِ بنجاہی وزیر اسد عمر ءَ گشتگ کہ پاکستان ءِ معاشی اشاری آنی سرءَ جوانیں مٹ اَتکگ، ملک ءَ نوول کورونا وائرس ءِ ہوپ انگت است اِنت، چین ءَ کورونا ہوپ ءَ را گرءُ دار کنگ ءِ ھاترءَ پاکستان ءِ سرجمءَ کمک کتگ، اے ہوپ ءَ چہ پاکستان معیشت ءِسرءَ ناوشیں اثر کپتگ اَنت کہ نو گرءُ دار کنگ بوتگ اَنت، چین ءُ بل اینڈ میلنڈا گیٹس فاونڈیشن ءِ نیمگءَچہ پاکستان ءَ را کورونا وائرس ءِ ویکسین دیئگ بیت، چین ءِ نیمگءَ چہ کشمیر ءِ جیڑہ ءِ سرءَ پاکستان ءِ لیکہ لکھ ستاہ کرز ایت۔ اے ھیالانی درشانی آئیءَ حاسیں گلگودار داتگ ءُ کتگ۔ آئی ءَ گشتگ کہ لاک ڈاؤن ہلاس کنگ ءِ حکم دیئگ ءِ وہدءَ ہم حکومت ءِ نیمگءَچہ کھڈن کنگ بوتگ کہ کورونا وائرس ءِ شنگ ءُ تالانی ءَ کمی اَتکگ۔ بلے اے ہوپ پاکستان ءَ انگت اَست اِنت۔ آئی ءَ گشتگ کہ گیٹس فاونڈیشن ءِ نیمگءَ چہ گاوی بزاں گلوبل الائنس فارویکسینیشن نامی گامگیج چست کنگ بوتگ کہ ایشیءِسرءَ پاکستان ءَ دستخط کتگ۔ اے گامگیج ءِ ردءَ منءُ گرءُ گرءِسرءَ دستخط کنوکیں ملک آں ویکسین ءِ لوٹ ءِ 20 درسد گاوی ءِ نیمگءَ چہ دیئگ بیت۔ وہدے کہ چینی سفیر ژاوجنگ ءَ 12 اگست ءَ بوتگیں گندءُ نند ءَ حال داتگ کہ پاکستان ءَ را پیسرءَ کورنا وائرس ءِ ویکسین دیئگ بیت۔
