اسلام آباد ۔ 13 اگست (اے پی پی) دری کارانی وزیر شاہ محمود قریشی ءَ گشتگ کہ بھارتی شہر بنگلور ءَ رسالت بے شرپی وئیل ءَ مسلمان آنی دل ءُ جزبگ بژن کتگ اَنت، میاں اوستمانی تنظیم اے گپ ءِ سرءَ گامگیج چست بہ کن اَنت ، بی جے پی حکومت ءَ سیکیولر سٹیٹ ءَرا کنڈ کتگ۔ بھارت ءِ شہر بنگلور ءَ بوتگیں ناوشیں ءُ دل سوچیں وئیل ءِ ہوالگءَ پنچ شمبے ءِ روچءَ وتی یک بیانے ءَ دری کارانی وزیرءَ گشتگ کہ رسالت بے شرپی ءِ اے وئیل ءَ مسلمان آنی جزبگ بژن کتگ اَنت۔ آئی ءَ گشتگ کہ مسلمان آنی دل بژن کنگ بنت ءُ آ شہید ہم کنگ بنت۔ اے ویڈیو ءَرا سرجمیں امت مسلمہ بہ چاریت۔ انڈیاءَ مرچی مسلمان اقلیت محفوظ نیاں۔ مخدوم شاہ محمود قریشی ءَ گشتگ کہ مسیت ءَ را شہید کنگ ءُ بندر جوڑ کنگ جوان نا اِنت۔ آئی ءَ گشتگ کہ سیکیولیرسٹیٹ ءَ را بھارت ءِ اے حکومتءَ کنڈ کتگ۔ مروچاں بھارت ءَ یک ہندو سٹیٹ ئے ودی بوتگ۔ اے تنا تہی ءُ توکی جیڑہے نااِت اے انسانیت ءِ جیڑہ اِنت۔ آئی ءَ گشتگ کہ ما ہمک میاں اوستمانی فورم ءَ اسلامو فوبیا ءِ جیڑہ ءَ را چست کنگ ءَ اَنت۔ دری کارانی وزیر ءَ گشتگ کہ مزن وزیر عمران خان ءِ جنرل اسمبلی ءِ گوستگیں دیوان ءَ کتگیں گوشتانک ءَ گیش بوتگیں اسلامو فوبیا ءِ زکر اَست اِنت۔جنرل اسمبلی ءِ نوک گچین بوتگیں صدر ءِ دیما ما اے جیڑہ چست کتگ۔
