چین ءَ کورونا ءِ ہوپ ءِ وہدءَ پاکستان ءَ را باز کمک کتگ، مدگانی جاورھال گرءُدار کنگ بوتگ، کراچی ءِ ڈرینز ءِ سرءَ دوشمبے ءِ روچءَکار بندات کنگ بیت
پاکستان ءَ کورونا وائرس ءِ ہوپ ءَ درساں چہ پیسرچین ءِ کمک کتگ، چینی سفیر
اسلام آباد ۔ 13اگست (اے پی پی) نیشنل ڈزاسٹر مینجمنٹ اتھارٹی چیئرمین لیفٹیننٹ جنرل محمد افضل ءَ گشتگ کہ چین ءَ پاکستان ءَ را کورونا ہوپ ءِ وہدءَ بے مٹیں کمک کتگ، مدگانی جاورھال گرءُ دار کنگ بوتگ، نو ایچ وڑیں تکانسری ءِ گپ نیست۔ آ پنچ شمبے ءِ روچءَ چین ءِ نیمگءَ چہ یک ہزار بائی پیپ ونٹیلیٹرز دیئگ ءِ موہءَ ہڈ داتگیں مراگش ءَ گوں تران کنگءَ بوتگ۔ آئی ءَ گشتگ کہ پاکستان ءُ چین ءِ دوستی بینگ ءَچہ گیش شیرکین ءُ زِرءَچہ گیش جہل اِنت، گوستگیں چار ماہ آں چہ اے دوستی ءِ نوکیں دروشمے دیما اَتکگ، پاکستان ءَ چینی سفیر ءَ گوں ہمک گندءُ نندءَ کمک ءَ را گیش کنگ بوتگ۔ آئی ءَ گشتگ کہ مارا چین ءِ نیمگءَ چہ لوکسٹ ءِ ھاترءَ 50 سپریئر ہونٹس ہم دیئگ بوتگ اَنت۔ این ڈی ایم اے ءِ چیئرمین ءَ گشتگ کہ پاکستان ءَ کورونا وائرس ءِ کیس کم بوہگءَ اَنت، بلے ہوپ انگت ہلاس نااِنت، مردم پرہیز ءَیل مکن اَنت۔ آئی ءَ گشتگ کہ شاہ آمید گس ءِ حکم ءِ ردءَ کراچی ءِ ڈرینز ءِ سرءَ کار ءِ منصوبہ بندی کنگ بوہگءَ اِنت، دوشمبے ءَ ایشی ءِ سرءَ کار بندات کنگ بیت۔ اے موہءَ پاکستان ءَ چین ءِ سفیر ژاوجینگ ءَ گشتگ کہ کورونا وائرس ءِ ہوپ ایندگہ دنیا ءِ وڑءَ پاکستان ءُ چین ءِ ھاترءَ ہم یک مزنیں جیڑہے اِت، پاکستان آ اولی ملک اِنت کہ آئی ءَ چین ءَ رامدام کمک کتگ۔ چینی سفیر ءَ گشتگ کہ پاکستان ءُ چین ءِ کوشستانی سببءَ کوویڈ۔19 ءِ جاورھال ٰءَرا گرءُ دار کنگءَ کمک رسیتگ۔ اے یک وشیں گپ اِت کہ پاکستان ءِ حکومت ءُ اُلس ءَ کوویڈ۔19 ءَ اینچو زوت گرءُ دار کتگ۔ آئی ءَ گشتگ کہ باندا پاکستان ءِ آجوہی ءِ روچ اِنت، گوں پاکستان ءَ سیادی گیش محکم بوہگءَ اَنت، ہمے وڑءَ پاکستان ءُ چین ءِ دوستی ہم گیش ترندءُ مھکم بوہگ ءَ اِنت۔ آئی ءَ گشتگ کہ مارا وشی اِنت کہ پاکستان ءِ حکومت ءَ اے ہوپ ءَ را گرءُ دار کنگءَ حاسیں کرد پیلو کتگ۔
