اسلام آباد۔ 12 اگست (اے پی پی) قومی اسمبلی انسداد دہشت گردی(ترمیمی) بل 2020ء نا منظوری ءِ تسنے۔ بنجائی وزیر کانود فروغ نسیم پارینے کہ اسلام امن نا دین ءِ اودے دہشت گردی تون گنڈنگ مفک، کانود جوڑ کننگ اٹ بنداوی انسانی حق انا رکھ ءِ پک کننگک۔ چارشنبے نادے آ قومی اسمبلی ٹی بنجائی وزیر کانود فروغ نسیم تحریک پیش کرے کہ انسداد دہشتگردی (ترمیمی) بل 2020ء آ سجفنگے۔ سید نوید قمر پارے کہ دہشت گردی نا حالیت آتیٹی ملک بھاز انگا ویل آتون مون تسنے۔ دا بل کالعدم تنظیم تیا پابندی نا بابت ءِ ہرکس کہ پاکستان یا پاکستان آن پیشن اسلام نا پن آ دہشت گردی کیک نن غٹ اونا برخلاف اواری اٹ جنگ ایتنہ ولے ہرا بندغ دہشت گرد اس اف اوداکانود نا زد اٹ بریک تو نن داکانود اٹ ہموگڑاتے اوار کین ہراڑآن بے گناہ زہمی بندغ آتا بنداوی انسانی حق انا رکھ ممکن مننگ کے۔ خواجہ محمد آصف پارے کہ ننا مسخت پاکستان نا شاری تا بنداوی حق انا رکھ ءِ۔ نن مہالو ہم کانود جوڑ کننگ اٹ داہیت ءِ کرین کہ مالیاتی ٹرانزیکشن تیٹی بزنس مین اسے نا حق زہمی مف۔ شاہ محمود قریشی پارے کہ داڑے منی لانڈرنگ مسنے ننے دانا تدارک ءِ کروئی ءِ۔ کانود جوڑ کننگ متوازن بایدے مرے۔ باسک آتا مثبت سلاہ تے اوار کننگک۔ ای وزیر کانود و اونا ٹیم ءِ مبارکباد پیش کیوہ۔ اوپارے کہ اسہ کنڈآ مخلوق آک پاریرہ کہ ہراتم اسکان نیب انا کانود بفک پین کانود سازی کپنہ۔ اوپارے کہ ایف اے ٹی ایف نا پاننگ آن مست نن بایدے دا کانود سازی ءِ تینٹ کروسن۔ نن غٹ باسک آتا کنڈآن تعمیری سلاہ تا خیرمقدم ءِ کرین و امنائی ودی مس۔ نادان سنگت آتا سوب آن ایوان نا ماحول خراب مریک۔ سید نوید قمر پارے کہ قومی فرض انا رداٹ نن امنائی ودی کننگ خوانہ۔ داوڑنا ہیت آتیان ماحول ءِ خراب کننگپ۔ باسک اس اولیکو وار ایوان نا باسک مرے یا ہشت وار غٹ انا شرف اسہ وڑ ءِ۔ محسن شاہنواز رانجھا پارے کہ نن بطور باسک قومی اسمبلی آئین نا رکھ انا سوغند ءِ ہرفینن۔ ننا زمواری ءِ کہ نن پاکستان نا الس نا بنداوی حق آتا رکھ ءِ پک کین۔ شاہدہ اختر علی پارے کہ نن آئین و انسانی حق آتا خلاف ورزی نا برخلاف اُن۔ نن دا بابت تینا ترمیم تے تسونن۔ بنجائی وزیر کانود فروغ نسیم پارے کہ داکانود نا امنائی سلاہ اٹ منظوری آ غٹ باسک آتا منت وار اُٹ، ننا غٹ انا مسخت اسٹ ءِ۔ آئین ہرا بنداوی انسانی حق تسنے اوفتا خلاف ورزی مفک۔ نن اپوزیشن نا سلاہ تا ستاءِ کینہ۔ زیات کانود سازی نا پیدواری ءِ کننگے نن اوفتے کم کینہ۔ نن ملک انا زرگزران ءِ بلیک آن وائٹ کننگ خوانہ۔ اگہ پاکستان ءِ مون آ ہنوئی ءِ و شون ہلوک ءُ ملک اس جوڑ کروئی ءِ تو ننے ایف اے ٹی ایف و منی لانڈرنگ کون آ باندات آتیا چکار کروئی مریک۔ مچ آ دنیا ٹی دافتا برخلاف سخت گام گیج کننگ انگ ءِ۔ بے پن آ ٹرانزیکشن آتا چٹنگ و زرگزران نا وائٹ مننگ بنداوی انسانی حق آتا رداٹ ءِ۔ اوپارے کہ مذہب و دہشت گردی ٹی پرخ پیدوار ءِ۔ اسلام امن نا دین ءِ۔ مولانا عبدالاکبر چترالی پارے کہ دارالحکومت اسلام آباد ٹرسٹ بل 2020 ء نا گڑاس شق آتیا ننا گڑتی ءِ۔ دا بل ءِ نن پیشن نا زور آ منظور کننگ اُن۔ دابل انا منظوری آن پد اسہ ہم دیندار ءُ بندغ اس رفاہ نا کاریم ءِ کننگ کپک، اللہ نا رضا و دین نا کاریم مفک۔ دابل ءِ ہم فی الحال پد بٹنگے و قابل عمل جوڑ کرسا منظور کننگے۔ اختر مینگل پارے کہ بل آتیا اپوزیشن و حکومت نا کنڈآن امنائی ودی مننگ ستاکڑزک ولے بلوچستان نیشنل پارٹی داامنائی ٹی اوار اف انتئے کہ ننے پت اٹ ہلنگتنے۔ نن دانا او یا نہ ٹی اوار افن۔ نن تہہ و پیشن نا زور آ وخت اس ہم سمجھوتہ کتنن۔ غٹ آن مست دہشت گردی نا سفت نا تعین بایدے مرے۔ مسکوہی وزیراعظم نواز شریف و راجہ پرویز اشرف ءِ ہم مستین دہشت گرد گوندنگا۔
