جشن آزادی ءِ شان و شرف اٹ اڈ ایتنہ، زندہ قومک تینا عظیم روایت آتے مدام زندہ تخرہ
اسلام آباد۔ 12 اگست (اے پی پی) وزیر مملکت موسمیاتی بدلی زرتاج گل پارینے کہ جشن آزادی ءِ شان و شرف اٹ اڈ ایتنہ، زندہ قومک تینا عظیم روایت آتے مدام زندہ تخرہ، ننے باوہ و پیرہ قربانی ترسا پاکستان ءِ دوئی کریر، آزادی نا دا نعمت نا قدر ءِ کروئی مریک۔ پوسکن آ چین ءِ شونہال و شون ہلوک پاکستان اس تننگ وزیراعظم عمران خان نا تغ ءِ، دانا شونداری کن ننے انفرادی و اجتماعی وڑاٹ بشخ ہلوئی مریک۔ یوم آزادی نا وخت آ مچ آ ملک اٹی ورناک نئے بیرہ تینا بشخ انا نیال اس خلیر بلکن ماحول ءِ ساف ستھرا تخنگ اٹ تینا کڑد ءِ ادا کیر۔ داخیال آتا درشانی ءِ او ’’اے پی پی‘‘ تون گپ وتران اٹی کرے۔ وزیر مملکت پارے کہ یوم آزادی نا دے ننے تینا بزرگ آتا قربانی تا یات ترفک تانکہ نن تینا غٹ تر لائخی تے کاریم اٹ اتسا ملکی شونداری ٹی زیات آن زیات بشخ ہلنگ کین۔ اوپارے کہ وزیراعظم عمران خان ہندن ءُ شونہال ملک اس جوڑ کننگ خواہک ہراڑکن بانی پاکستان قائد اعظم محمد علی جناح جہد کریسس و او قائد نا وژن ءِ ہلسا مون آ ہِننگ ءِ۔ زرتاج گل پارے کہ زندہ قومک نئے بیرہ تینا روایت آتے زندہ تخرہ بلکن تینا بروک آ چین تا شرحالی کن وخت آ گام گیج کیرہ۔ و وزیراعظم عمران خان پوسکن آ چین ءِ ساف ستھرا پاکستان اس تننگ کن کلین اینڈ گرین ڈٹ انابناءِ کرینے و اونا دا وژن آ ننا وزارت جنگی بنداو تیا کاریم کننگ ءِ۔ اوپارے کہ دامسخت کن 9 اگست آ ٹائیگر فورس ڈے انا وخت آہم وزیر اعظم عمران خان نئے بیرہ تینٹ نیال اس خلک بلکن ورناتے ہم پارے کہ او تینا بشخ انا نیال خلیر۔ اوپارے کہ مچ آ دنیا ٹی موسمیاتی بدلی ترندی اٹ رونما مننگ ءِ و پاکستان ہم داڑآن بھاز بے وڑ زہمی مننگ ءِ ننا وزارت دا بابت پبی گام گیج کننگ ءِ۔
