اسلام آباد۔ 11 اگست (اے پی پی) بنجائی وزیر مذہبی امور پیر نورالحق قادری انکشاف کرینے کہ سوشل میڈیا غا مقدس ہستی تا بارواٹ توہین آمیز مواد اسرائیلی ایجنسی موساد نا کنڈآن اسہ سجفوک ءُ ڈٹ اسے نا رداٹ تالان کننگ انگ ءِ، ہشت فقہ غاتیان اسہ فقہ اسے نا ہم منوک آتے کافر گوندنگ مفک، عالم دین تا فرض ءِ کہ او دا چم ءِ بے سہب کیر و امت نا نیام اٹ سیوت ودی کننگ کن محراب و منبر ءِ کاریم اٹ اتیر۔ اسلامی نظریاتی کونسل نا تیار کروک آ سلاہ و سوج آک بایدے محراب و منبر اسکان سرمریر، حکومت ہرقیمت آ تینا رٹ ءِ برقرار تخک۔ سے شنبے نادے آ اسلامی نظریاتی کونسل اٹ چندی مسلک آتا منوک آتا نیام اٹ رابطہ نا سرحال آن اڈ ہلوک آ کنونشن اٹی بطور مہمان خاص تران کرسا اوپارے کہ منہ وخت آن سوشل میڈیا غا مقدس ہستی تا بارواٹی توہین آمیز گپ وتران سجفوک ءُ ڈٹ اسے نا رداٹ تالان کننگ انگ ءِ۔ داکان پد ہم پاکستان ءِ نزور کننگ نا چار عشرہ غاتیا تالان کوشست آک بے سہب مسنو۔ اوپارے کہ ملک اٹی سنی، شیعہ، اہل حدیث و بریلوی تے اسہ ایلو تون جنگ تننگ نا کوشست آک ہم بے سہب مسنو۔ اوپارے کہ سوشل میڈیا غا ناسمجھ مخلوق بیداد سوچ و سمجھ لگانو۔ پاکستان ءِ لسانی، مذہبی، مسلکی و علاقائی بنداو تیا نزور کننگ نا ہر چم بے سہب مسنے۔ داسہ آخیریکو کوشست شیعہ، سنی، بریلوی، دیوبندی و سلفی نا نیام اٹ پھسات تالان کننگ نا کوشست مننگ ءِ۔ اوپارے کہ اسرائیل اٹی موساد نا اسہ زالبول اس جعلی اکاؤنٹ آن فرقہ وارانہ پھسات تالان کننگ ءِ۔
