اسلام آباد۔ 11 اگست (اے پی پی) صدر مملکت ڈاکٹر عارف علوی پارینے کہ اینو نا دے نن دا عزم انا درشانی ءِ کینہ کہ راج اٹی سگ و رواداری نا رویہ ءِ برجاتخنگک، اقلیتی برادری ملک انا شونداری و شونہالی ٹی اہم کڑد ادا کننگ ءُ۔ اقلیت آتا دے انا وخت آ تینا کلہو اٹی صدر مملکت پارے کہ اینو نادے پاکستانی تاریخ اٹ خصوصی اہمیت تخوک ءُ دے اسے۔ دادے آنن تینا اقلیت آتون روادری اٹ پیش بننگ نا دا وعدہ نا تجدید ءِ کینہ ہرانا درشانی ءِ قائد اعظم محمد علی جناح 11 اگست 1947ء آ پاکستان نا دستور ساز اسمبلی نا مون آ کریسس۔ ہندا اہمیت نا رداٹ 11 اگست آ اقلیت آتا دے ءِ سرکاری وڑاٹ اڈتننگک تانکہ اوفتا مذہبی آجوئی و راجی آسراتی ءِ مون آ دننگ دوئی مرے۔ اوپارے کہ اقلیت آتون رواداری اٹ نئے بیرہ ننا راج اٹ اوار ءِ بلکن ننا مذہب اسلام ہم غٹ مذہب آتون بردباری نا رغامک۔ خواجہ صلی اللہ علیہ و آلہ وسلم نا حیات طیبہ و حدیث آتیان ہم ننے اقلیت آتون بریبری نا سلوک کننگ نا سبخ ملک۔ ریاست مدینہ، ہراننکن اسہ بے مٹ ءُ ریاست اسے نا حیثیت تخک ، ننے اقلیت آتون بردباری و انصاف نا روایہ روا تخنگ نا سبخ ایتک۔ میثاق مدینہ ٹی، مدینہ ٹی رہینگوک آ غٹ مذہب آتا مخلوق ءِ اوفتا سیاسی ، راجی و زرگزرانی حق آتا ضمانت تننگا۔ صدر مملکت پارے کہ اسہ ملک اس ہم ہمووخت اسکان شون ہلنگ کپک، ہراوخت اسکان او اسہ قوم اس مرسا مون آ بف و دا اعتبار اٹ پاکستانی اقلیت آتا کڑد نمان اہمیت تخک۔ اقلیت آک زند انا ہر بشخ اٹی پاکستانی نا شونداری وشونہالی کن بھلو خذمت اس سرتسنو و اینو ہم اقلیتی برادری نا بندغ آک تعلیم، طب، فوج و بیوروکریسی تون اوار چندی بشخ آتیٹی ملک انا شونداری و شونہالی ٹی کلیدی کڑد ادا کننگ ءُ و نن اوفتا جوزہ و خواری تے قدر انا نظر اٹ ہرنہ۔ اوپارے کہ نن اینو نادے دا عہد کینہ کہ انفرادی کہول آ ہر پاکستانی شاری تینا ہم وطن آتا خیال ءِ تخنگ نا زمواری ءِ جوانی اٹ ادا کیک۔ اینو نادے نن عزم انا درشانی ءِ کینہ کہ اقلیت آتا برخلاف تعصبانہ رویہ غان پاناد کرسا راج اٹ سگ، رواداری و ایلمی نا چاگڑد ءِ برجا تخنگک۔ دا گل زمین آ رہینگوک آ غٹ قوم آتون اسہ وڑ سلوک کننگک و غٹ ءِ بریبری و شرف تننگک تانکہ دا ملک پین شونہالی و شونداری نا کنڈآ ہِننگ کے۔
