راولپنڈی۔ 10 اگست (اے پی پی) پاکستان تحریک انصاف راولپنڈی نا زالبول پارلیمنٹرین آک پارینو کہ یوم آزادی نا وخت آ بیرک خلنگ نا جاگہ غا شجرکاری مہم نا رداٹ پوسکن ءُ نیال خلنگک، شاراٹی شورشرابا، ون ویلنگ و کارریسنگ آ پورو پابندی خلفنگ کن صوبائی اسمبلی آن نوٹیفکیشن اس جاری کرفنگک و مثبت سرجز اڈ تننگک۔ داخیال آتا درشانی ءِ دوشنبے نادے آ پاکستان تحریک انصاف پنجاب اسمبلی نا باسک عابدہ راجہ و فرح آغا’’اے پی پی‘‘ تون خصوصی گپ وتران کرسا کرے۔ ایم پی اے عابدہ راجہ پارے کہ سڑک آتیا خلوک آ بیرک آتیان بیرہ پیسہ زیان مریک وخت اس کہ نیال خلنگ آن ملک انا آخبت گچین مریک۔ اوپارے کہ وزیراعظم عمران خان نا وژن نا رداٹ مچ آ ملک انا ایلو شار تیانبار راولپنڈی ٹی ہم 14 اگست یوم آزادی آ پوسکن ءُ نیال خلنگک وخت اس کہ ٹائیگر فورس انا کنڈآن راولپنڈی شار نا چندی علاقہ غاتیٹی پروگرام اڈ تننگک۔ ایم پی اے فرح آغا پارے کہ ون ویلنگ و کارریسنگ اسہ خطرناک ءُ گوازی اسے و یوم آزادی نا وخت آ زیات تر ورناک دا کاریم ءِ کیرہ ہراڑآن کیہی نہادی جان زیان مریک۔ اوپارے کہ ون ویلنگ ءِ چٹفنگ کن پنجاب اسمبلی آن نوٹیفکیشن اس جاری کرفنگک تانکہ راولپنڈی نا ضلعی انتظامیہ و پولیس دا جان ءِ ہلوک آ گوازی نا برخلاف گچین کارروائی کننگ کیر۔ فرح آغا پارے کہ راولپنڈی ٹی یوم آزادی آ اسپیشل ڈبل ڈیکر بس اس چلیفنگک ہراٹی غٹ شاریک سیر کننگ کیرہ وخت اس کہ ٹائیگر فورس انا کنڈآن چندی ریلی، دود و سیمینار اڈتننگک۔
