اسلام آباد۔ 10 اگست (اے پی پی) وزیر خارجہ شاہ محمود قریشی پارینے کہ اقوام متحدہ نا جنرل اسمبلی مقبوضہ جموں و کشمیر اٹی برجاانسانی حق آتا خلاف ورزی تے تورے و کشمیر نا ویل انا پرامن ایسری کن تینا گچین کڑد ءِ ادا کے، پاکستان اسیجائی زمواری نا رداٹ اوغانستان اٹ امن کن تینا خیرخواہی کڑد ءِ جوان انگا نیت اٹ ادا کننگ ءِ، ڈیہہ ٹی دیرپاامن و سوگوی کن بین الاوغان مذاکرات نا زوت اڈتننگ المی ءِ۔ داہیت آتے او اقوام متحدہ نا جنرل اسمبلی نا پوسکن گچین مروک آ صدر وولکن بوزکر تون گپ وتران کرسا پارے ہرادوشنبے نادے آ داڑے وزارت خارجہ ٹی اوڑتون اوڑدہی کرے۔ ترجمان دفترخارجہ نا رداٹ اوڑدہی ٹی سیکرٹری خارجہ سہیل محمود، ڈی جی یواین و وزارت خارجہ نا سینئر آفیسر آک بشخ ہلکر۔ اوڑدہی ٹی اقوام متحدہ جنرل اسمبلی نا 75 می دیوان آن تعلقدار باندات، دیوان نا ایجنڈاتون اوار تین پہ تینی است خواہی نا چندی باندات آتیا گپ وتران کننگا۔ وزیر خارجہ وولکن بوزکر ءِ اقوام متحدہ جنرل اسمبلی نا 75 می دیوان کن صدر گچین مننگ آ مبارکبادی تس و نیک است خواہی تا درشانی ءِ کرے۔ وزیر خارجہ پارے کہ اقوام متحدہ جنرل اسمبلی نا 75 می دیوان کن جاری کروک آ ایجنڈاستاکڑزک۔ مخدوم شاہ محمود قریشی پارے کہ اقوام متحدہ جنرل اسمبلی ناہفتاد ءُ پنچ می دیوان داخاطرآن ہم خصوصی اہمیت تخک انتئے کہ دنیا اسہ کنڈآ کورونا جہانی دَینی چیلنج اتون مون تننگ کن کوشست کننگ ءِتو ایلو کنڈآ نن جہانی زرگزرانی تنکی ءِ ہُننگ اُن پاکستان، داسال دینی رداٹ جنرل اسمبلی نا اڈتننگ نا وڑوڈول نا فیصلہ غان امنا ءِ، اوپارے کہ ننےداہیت انا ہم جوانی اٹ سماءِ کہ دینی حالیت آتا رداٹ جہانی راہشون تا بھلو کچ اسے ٹی جنرل اسمبلی دیوان اٹ روایتی ساڑی مننگ مناسب مفک۔ مخدوم شاہ محمود قریشی پارے کہ کورونا نا جہانی دینی چیلنج اتون مون تننگ کن جہانی کہول آ جامع و اسیجائی کوشست آتے کاریم اٹ اتوئی مریک۔ کورونا ویکسین نا تیاری کن بھاز انگا ملک آک تینا کوشست آتے کاریم اٹ اتنگ ءُ۔ اومیت ءِ کہ کورونا ویکسین اسکان رسینگ غٹ ملک آک خاص وڑاٹ پدتموک ملک آتے اولیتی بنداوتیا ممکن کننگک۔ وزیر خارجہ کورونا نا دین انا مضمر آتون مون تننگ و نزور زرگزران تا زرگزرانی بحالی کن وزیراعظم عمران خان نا کنڈآن پدتموک ملک آتیکن وام تیٹی آسراتی نا سلاہ آن ہم پوسکن گچین مروک آ صدر جنرل اسمبلی ءِ معلومدار کرے۔ وزیر خارجہ اقوام متحدہ جنرل اسمبلی نا پوسکن گچین مروک آ صدر ءِ مقبوضہ جموں و کشمیر اٹی برجا انسانی حق آتا خلاف ورزی تیان معلومدار کرسا پارے کہ بھارت مقبوضہ جموں و کشمیر اٹ اقوام متحدہ نا سیکورٹی کونسل نا قرارداد و جہانی کانود نا خلاف ورزی ءِ کرسا مقبوضہ کشمیر نا آئینی حیثیت ءِ بدل کننگ کن 5 اگست 2019 آ اسہ کنڈی گام گیج کرے۔ مقبوضہ کشمیر اٹی بھارتی کوزہ گیر فوج انا کنڈآن کشمیری تا عدالت آن ایڑتر خون، کودک شاری تیا بے سوب سم کاری و بیدادی معمول مسنے۔ مخدوم شاہ محمود قریشی پارے کہ بھارت لین آف کنٹرول نا پدریسہ خلاف ورزی تا کمک اٹ کودک شاری تے سم تا شست کننگ ءِ۔ اوپارے کہ کشمیر نا ویل اقوام متحدہ نا قراردادآتے مون آ تخسا جہانی کہول آ اسہ جھیڑہ ئی ءُ ویل اسے ہرادے پک سیکرٹری جنرل اقوام متحدہ تینا 8 اگست 2019ء نا بیان اٹی ہم کرینے ہراریکارڈ نا بشخ اسے۔ مخدوم شاہ محمود قریشی پارے کہ ننے اومیت ءِ کہ اقوام متحدہ جنرل اسمبلی، تینا وژن ءِ مون آ تخسا مقبوضہ جموں و کشمیر اٹ برجاانسانی حق آتا خلاف ورزی تے تورفنگ و اقوام متحدہ نا قرارداد آتے مون آ تخسا، کشمیر نا ویل انا پرامن ایسری کن تینا گچین کڑد ءِ ادا کیک۔ پاکستان، اقوام متحدہ تون اوار غٹ جہانی فورم تیا بھارت نا عزم انا بابت معلومدار کرینے۔ ہڑتوم آ راہشون تا نیام اٹ اوغان امن عمل تون اوار، ڈیہہ ٹی برجاامن و سوگوی نا کوشست آتیا ہم گپ وتران مس۔
