اسلام آباد۔ 07 اگست (اے پی پی) مچ آ ملک اٹی 9 اگست آ ٹائیگرفورس ڈے ءِ اڈتننگ نا تیاریک زور و شور اٹ برجاءُ۔ وزیراعظم عمران خان نا پارت آ صوبائی کہول آ گام گیج آتیٹی ترندی اتنگ انگ ءِ۔ دارداٹ جمعہ نادے آ وزیراعظم نا خصوصی کمکار امور نوجوانان خصوصی عثمان ڈار گورنر سندھ عمران اسماعیل تون اوڑدہی کرے۔ اوڑدہی ٹی سندھ اٹی ہم ٹائیگر فورس انا منشاکار آتے متحرک کننگ نا فیصلہ کننگا۔ صوبائی حکومت نا کمک کپننگ آن پد ہم صوبہ ٹی ٹائیگر فورس ڈے ءِ اڈ تننگک۔ سندھ اٹی ٹائیگر فورس انا کماشی ءِ گورنر سندھ عمران اسماعیل کیک۔ خصوصی کمکار عثمان ڈار پارے کہ قومی فائدہ نا معاملہ ٹی سندھ حکومت نا کمک کپننگ است ہسونی نا سوب ءِ۔ وزیراعلیٰ سندھ آن خواست کریسن کہ باندات ءِ سیاست نا گواچی کپ۔ اوپارے کہ شجر کاری مہم نا غٹ آن زیات گرج داوخت آ سندھ انا علاقہ غاتیٹی ءِ۔ جند انا اَنا و ضدآ سلنگ نا جاگہ غا پاکستان و بروک آ چین تیکن سجفر۔ اوپارے کہ بنجائی حکومت ٹائیگر فورس منشاکارآتے تنیا الیپک۔ وزیراعظم نا وژن نا رداٹ کلین گرین پاکستان نا غٹ آن بھلا مہم نا بناءِ کینہ۔ گورنر سندھ قومی مہم اٹ پبی کمکاری نا باوری کرفے۔ گورنر سندھ پارے کہ ورنامنشاکارآتا پبی است بڈی ءِ کینہ۔ تینٹ ٹائیگر فورس اتون شجرکاری مہم اٹ بشخ ہلیوہ۔
