اسلام آباد۔ 07 اگست (اے پی پی) بنجائی وزیر شونداری و ڈٹ بندی اسد عمر نا کماشی ٹی نیشنل کمانڈ اینڈ آپریشن سینٹر مارننگ سیشن نا وخت آ چندی بشخ آتا بنائی مرحلہ و یوم آزادی و محرم نا بابت سرجم گپ وتران کننگا۔ فورم ءِ معلومدار کننگاکہ راجی مُری نا گام گیج و ماسک بیننگ ءِ پک کننگ کن اسہ پورو ءُ ضابطہ اخلاق اس جوڑ کننگانے۔ فورم ءِ پاننگاکہ فیس ماسک و سادہ انگا پُچ آتا ماسک انا کاریم اٹ اتنگ آن کوویڈ نا تالانی ءِ توننگ اٹ کمک ملک۔ اسد عمر مستی پارے کہ جان جوڑی نا راہشون و رکھی گام گیج آتون چندی بشخ آتے ملوئی مریک۔ کوویڈ نا خطرہ داسہ ہم ارے و اگہ جان جوڑی نا راہشون اصول آتیا عمل کننگپک تو مدام خطرہ سلک کہ دا ناجوڑی ولدا تالان مننگ کیک۔ اومستی پارے کہ پاکستان نا الس بھلو زموار ءُ قوم اسے ءُ و اوفک جان جوڑی نا چندی راہشون اصول آتیا عملدرآمد کننگ تون اوار اوار بھاز صبر و تحمل نا درشانی ءِ کرینو۔ اگہ ہنداجوزہ اٹ محرم نا جلوس آتیا ہم ایس او پی تیا عملدرآمد کننگے تو داڑآن دا ناجوڑی نا تالانی ءِ توننگ مریک۔ بنجائی وزیر شونداری و ڈٹ بندی اسد عمر بنجائی و صوبائی انتظامیہ غا زور شاغا کہ او بروک آ محرم اٹ گچین گام گیج آتا کمک اٹ الس نا رکھ ءِ پک کیر۔
