اسلام آباد۔ 07 اگست (اے پی پی) وزیر خارجہ مخدوم شاہ محمود قریشی تون سندھ اسمبلی ٹی اپوزیشن راہشون فردوس شمیم نقوی نا کماشی ٹی تحریک انصاف نا سندھ آن اسمبلی نا باسک آتا ڈل جمعہ نادے آ وزارت خارجہ ٹی اوڑدہی کریر۔ اوڑدہی ٹی سندھ انا تنظیمی و سیاسی باندات آگپ وتران مس۔ وزیر خارجہ سندھ اسمبلی نا باسک آتے وزارت خارجہ غا بننگ آ بخیر اٹ پارے۔ اسمبلی نا باسک آک وزیر خارجہ ءِ تینا حلقہ غاتا ویل آتیان ہم معلومدار کریر۔ شاہ محمود قریشی پارے کہ سندھ اٹی مشکل حالیت آتیان پد ہم نم ہراوڑ اپوزیشن نا کڑدءِ ادا کننگ اورے او ستاکڑزک۔ پی ٹی آئی راہشون فردوس شمیم نقوی کشمیری تتون یکجہتی نا درشانی ءِ کننگ کن یوم استحصال ءِ پبی وڑاٹ اڈتننگ و گچین خارجہ پالیسی ءِ کاریم اٹ اتسا مودی سرکار نا اصل دروشمءِ دنیا نا مون آ پاش کننگ آ وزیر خارجہ ءِ مبارکباد پیش کرے۔ شمیم نقوی پارے کہ وزیراعظم عمران خان ہرا پاکستان نا سیاسی نقشہ ءِ جاری کرے انشاء اللہ بھاز زوت ہمونقشہ مریک۔ اپوزیشن لیڈر سندھ اسمبلی فردوس شمیم نقوی تون اوار سندھ اسمبلی نا صوبائی باسک آک سدرہ عمران، بلال غفار، عمران شاہ و سنجے گنجوانی ئسک اوار ئسر۔
