تعلقدار حلقہ غاتیٹی شونداری و فلاحی ڈٹ آتیان معلومدار کریر
لاہور۔ 07 اگست (اے پی پی) وزیراعظم عمران خان تون فیصل آباد آن تعلق تخوک آ قومی اسمبلی نا باسک آک جمعہ نادے آ اوڑدہی کریر۔ وزیراعظم آفس نا میڈیا ونگ انا کنڈآن جاری بیان نا رداٹ بنجائی وزیر حوالکاری سینیٹر شبلی فراز، سلاہکار مرزا شہزاد اکبر و وزیراعلیٰ پنجاب سردار عثمان بزدار ئسک ہم اوڑدہی ٹی ساڑی ئسر۔ وزیراعظم تون اوڑدہی کروک آ قومی اسمبلی نا باسک آتیٹی چوہدری محمد عاصم نذیر، نواب شیروسیر، رضانصراللہ گھمن، خرم شہزاد، فرخ حبیب، فیض اللہ و راجہ ریاض احمد اوار ئسر۔ قومی اسمبلی نا باسک آک وزیراعظم ءِ تینا تعلقدار حلقہ غاتیٹی شونداری و فلاحی ڈٹ آتا بابت معلومدار کریر۔ اووزیراعظم ءِ کورونا نا دین ان احالیت آتیان معلومدار کرسا دا دین انا مون ءِ توننگ کن حکومتی حکمت عملی آ خراج تحسین پیش کریر۔ باسک آک کورونا نا دین اٹی گچین کارکڑد آ فیصل آباد انتظامیہ نا ہم سفت ءِ کریر۔ ڈل کشمیر نا ویل ءِ تالان کننگ و خاص کر بھارت نا کنڈآن جابرانہ و اسہ کنڈی گام گیج، غیر انسانی گھیڑ، بنداوی انسانی حق آتا لتاڑنگ نا حالیت آتے جہانی کہول آ تالان کننگ نا بابت وزیراعظم عمران خان نا کوشست آتے پبی خراج تحسین پیش کریر۔ وزیراعظم عمران خان باسک آتون گپ وتران کرسا پارے کہ فیصل آباد زرگزرانی وڑاٹ بھلو اہم حیثیت اس تخک۔ اوپارے کہ حکومت صنعتی بشخ انا شونداری آ پبی چکار کننگ ءِ، آسراتی آن کاروباری تپہ ءِ آسراتی و تعمیرات نا بشخ شون ہلیک۔ وزیراعظم پارے کہ چنکا و نیامی درجہ نا کاروبار نا مون آ دننگ کن ہم گام گیج کننگ اُن، صنعتی بشخ و کاروباری سرجزآتا مون آ دننگ کن بنجائی حکومت ہروڑنا کمک کیک۔
