اسلام آباد۔ 06 اگست (اے پی پی) وزیر خارجہ مخدوم شاہ محمود قریشی پارینے کہ ڈیجیٹل ڈپلومیسی وخت انا اہم ءُ گرج اسے، وزارت خارجہ ءِ ساڑی آ دور انا خواست آتون ہم گرنچ کننگ کن جامع و قابل عمل سلاہ تے مون آ اتنگے۔ داہیت ءِ او پنچ شنبے نادے آ وزارت خارجہ ٹی ڈیجیٹل ڈپلومیسی پڑک دیوان نا کماشی ءِ کرسا پارے۔ ڈیجیٹل ڈپلومیسی پڑک وزیرخارجہ نا پبلک ڈپلومیسی وژن نا بشخ اسے ہراٹی ڈیجیٹل و تکنیکی چاہندار آک اوار ءُ۔ ڈیجیٹل ڈپلومیسی پڑک نا باسک آتیٹی وزیراعظم نا فوکل پرسن ڈیجیٹل میڈیا ڈاکٹر ارسلان خالد، نیشنل انفارمیشن ٹیکنالوجی بورڈ انا سی ای او سید شباہت علی شاہ، جنرل منیجر ڈیجیٹل میڈیا ونگ وزارت حوالکاری عمران غزالی، ڈیجیٹل ایکسپرٹ تانیہ ایدروس، پروپاکستانی بلاگ نا بانی عامر عطاء، پبلک ریلیشنز ایکسپرٹ سلیناراشد و وزیر خارجہ نا سلاہکار پبلک ڈپلومیسی عمران اختر اوار ءُ۔ وزیر خارجہ پارے کہ کوویڈ۔ 19 دنیا ءِ یکسر بدل کرینے، ڈیجیٹل ڈپلومیسی وخت انا اہم ءُ گرج اسے۔ وزارت خارجہ ءِ اللہ تعالیٰ گچین ہیومن ریسروس تسنے، وزیر خارجہ پارے کہ گرج دا ہیت انا ءِ کہ بدل مروک آ وخت انا خواست آتے ہُرسا ٹیکنالوجی ءِ کاریم اٹ اتنگے، آفیسر آتے روایتی سفارتکاری تون ڈیجیٹل سفارتکاری نا رموز آتیان بہرور کننگے۔ وزیر خارجہ ڈیجیٹل ڈپلومیسی پڑک ءِ پارت کرے کہ وزارت خارجہ ءِ ساڑی آ دور انا خواست آتون ہم گرنچ کننگ کن جامع و قابل عمل سلاہ تے مون آ اتنگے۔
