اسلام آباد۔ 06 اگست (اے پی پی) نیشنل کمانڈ اینڈ آپریشن سینٹر دینی مرض آتیٹی ودکی ءِ توننگ نا بابت السی بیداری مہم ءِ ترند کننگ نا فیصلہءِ کرینے۔ نیشنل کمانڈ اینڈ آپریشن سینٹر(این سی او سی) ملک اٹ کوروناوائرس نا دَین انا تالانی ءِ توننگ کن بھلو کچ اسے ٹی السی شعور نا بیداری نا مہم نا بناءِ کننگ نا فیصلہ ءِ کرینے۔ دا فیصلہ ءِ بنجائی وزیر شونداری و ڈٹ بندی اسد عمر نا کماشی ٹی این سی او سی نا دیوان اٹ کننگا۔ فورم ءِ پاننگاکہ دُن تو ملک اٹ کورونا وائرس نا دین انا تالان مننگ اٹ پیدوار کمتی مون آ بسنے ولے لس وڑاٹ ایس او پی تیا عملدرآمد کننگ نا باندات اٹی ہم کمتی مون آ بسنے، السی ہند آتیا ماسک و راجی فاصلہ غاتیا عملدرآمد نا بابت وخت آ گام گیج کننگے۔ ہلوک آ ناجوڑی پورو وڑاٹ داسکان چٹتنے و دا ناجوڑی نا بابت ایس او پی تیا عملدرآمد کرسا داڑآن بچنگ مریک۔ جون انا نیام اٹ ہراتم کوروناوائرس نا ناجوڑ آتا کچ ودا و ہسپتال آتیا بھاریم زیات مس تو حکومت ہسپتال آتا کچ ءِ ودفنگ کن مچ آ ملک اٹی 2150 آکسیجن کٹ آتے 31 جولائی اسکان اوار کننگ کن عملی گام گیج آتا بناءِ کرے۔ ولے این سی اوسی نا ٹیم تا غٹ صوبہ بشمول آزاد کشمیر و گلگت بلتستان نا دورہ غاتیٹی 2850 آکسیجن کٹ آتے اوار کننگ کن عملی دروشم اس تننگ نا کوشست آتا بناءِ کننگا۔ داتم اسکان 2608 پوسکن آ آکسیجن کٹ آتے مچ آ ملک انا ہسپتال آتیٹی اوار کننگانے ہرافتے ٹی آزاد کشمیر اٹ 80، بلوچستان اٹ 264، گلگت بلتستان اٹ 100، خیبر پختونخوا ٹی 400، پنجاب اٹ 787، سندھ اٹی 351و اسلام آباد اٹی 626آکسیجن کٹ اوار کننگانے وخت اس کہ 242 پین پوسکن آکسیجن کٹ(10 خیبر پختونخوا، 17 پنجاب و 215 سندھ) اوار کننگ آ کاریم برجاءِ۔
