اسلام آباد۔ 06 اگست (اے پی پی) بنجائی وزیر ریلوے شیخ رشید احمد پارینے کہ وزیراعظم عمران خان نا حکومت اٹ ریلوائی نا بشخ اٹ تاریخ ساز شونداری کاریم مننگ والا ءِ ، ایم ایل ون ڈٹ ءِ ایکنک منظور کرینے، دا ڈٹ آن ریلوائی نا مچ آ سسٹم خودکار مریک، ایم ایل ون ڈٹ اٹ 90 درسد ملازمت پاکستانی تیکن جتا مریک، ایم ایل ون ڈٹ آن نئے بیرہ ٹرین تا کچ ودک بلکن سفر نا وخت ءُ پاس ہم کم مریک، نالہ لئی پروجیکٹ آہم زوت کاریم نابناءِ کننگک، ایم ایل ون ڈٹ آن پد ایم ایل 2، ایم ایل 3و 4 ڈٹ ہم ارے، ساڑی حکومت تینا پنچ سال انا مد ءِ پورو کیک۔ پنچ شنبے نادے آ پی آئی ڈی ٹی پریس کانفرنس آن تران کرسا اوپارے کہ اینو ای مچ آ قوم ءِ مبارکباد تننگ خواوہ، 14 سال مست ہراڈٹ آ ای دستخط کریسٹ اینو وزیراعظم عمران خان نا حکومت دادے پورو کننگ والا ءِ۔ اوپارے کہ ای دا ڈٹ آ وزیراعظم عمران خان و آرمی چیف جنرل قمر جاوید باجوہ نا منت وار اُٹ۔ ایم ایل ون ڈٹ آن کراچی آن پشاور اسکان 1780 کلومیٹر نا ڈبل ٹریک آ کاریم مریک و دا ڈٹ آ چین نا کمک اٹ 6.80 بلین ڈالر خڑچ بریک۔ اوپارے کہ دا ڈٹ آ 90 درسد پاکستانی لیبر کاریم کیک ہراڑآن یک و نیم آن 2 لکھ بندغ ءِ روزگار دوبریک۔ شیخ رشید احمد پارے کہ ریلوائی ٹی شکست آتا بھلا سوب ریلوائی کراسنگ ءِ، دا ڈٹ آن خودکار سسٹم بناکیک ہراڑآن نئے بیرہ شکست آتیان بچنگ مریک بلکن سفر نا پوروی ٹی ہم وخت انا بچت مریک۔ اوپارے کہ دا ساڑی حکومت نا غٹ آن بھلا ڈٹ ءِ و نن دادے ریلوائی نا تاریخ ساز ڈٹ ہم پاننگ کینہ انتئے کہ مستین ریلوائی نا شونداری نا بابت داخہ در بھلو ڈٹ اتنگتنے۔ اوپارے کہ ایم ایل ون ملک انا کم و ود 71 درسد آبادی آن گدرینگک ہراڑآن شاری تے سفرنا گچین آسراتی دوبریک۔ اوپارے کہ داڑآن مسافر ٹرین تیٹی ہم خاطر خواہ ودکی مریک ہرا 34 آن ودسا 140 اسکان سرمریک۔ داکان بیدس مال بردار ٹرین تا کچ ءِ ہم 160 اسکان دینہ۔ شیخ رشید احمد پارے کہ راولپنڈی ٹی وخت آ شونداری ڈٹ آتیا کاریم کننگ کنا مدام اولیت مسنے، زوت نالہ لئی آ کاریم نابناءِ کننگک۔شیخ رشید پریس کانفرنس اٹ صحافی تا سوج آتا ورندی ءِ ترسا پارے کہ وزیراعظم عمران خان نا حکومت تینا پنچ سال انا مد ءِ پورو کیک و الس تون کروک آ وعدہ غاک پورو مریرہ۔
