اسلام آباد۔ 06 اگست (اے پی پی) بلوچستان حکومت صوبہ نا 770 کلومیٹر کرکی پٹی تون اوار اوار سیل و سوات نا آسراتی تیٹی ودکی کرسا کٹیا ودی کننگ کن ماسٹرپلان اس تیار کرینے۔ پنچ شنبے نادےآ بلوچستان حکومت نا عہدیدار اس پارینے کہ حکومت 770 کلومیٹر کرکی ڈیہہ نا گچینی و جوڑ کننگ کن 150 ملین روپئی جتا کرینے وخت اس کہ بلوچستان نا کرکی علاقہ غاتیٹی زرکاری و سیل و سوات نا بھلو وارخواہی اس ارے، حکومت صوبہ نا کرکی پٹی نا شونداری و گچینی آ خصوصی چکار کننگ ءِ۔ اوپارے کہ حکومت صوبائی کرکی علاقہ غاتا سیل و سواتی ہند آتا پیدواری ءِ کننگ و ہموڑے سیل و سواتی ہنکین جوڑ کننگ نا ڈٹ اس جوڑ کرینے۔ اوپارے کہ صوبائی حکومت سیل و سواتی تے بنداوی آسراتی تا فراوانی کن کوشست کننگ ءِ و کرکی پٹی ٹی ماحولیاتی سیل و سوات نا مون آ دننگ و شونداری کن فزیبلٹی تیار کننگ ءِ۔ اومستی پارے کہ بلوچستان نا کرکی علاقہ غاتیٹی ماحولیاتی سیل وسوات ءِ مون آ دننگ کن اسہ ہزار ملین روپئی نا خڑچ آن 7 سیل و سواتی ریزارٹ جوڑ کننگک۔ اوپارے کہ اسہ ہزار ملین روپئی نا خڑچ آن کوسٹل ہائی وے آ 10 ہند آتیا پوسکن آسراتی انگا ریسٹ ایریاجوڑ کننگک۔ صوبہ ٹی بروک آ سیل و سواتی تے کرک سمندر آ سیل و سوات فراوان کننگ کن اسہ ہزار ملین روپئی نا خڑچ آن 8 جیٹیز ہلنگک ہرا ماہی گیری نا مسخت آتیکن ہم کاریم اٹ اتنگ مریرہ۔ اوپارے کہ ماہی گیرآتیکن بلوچستان گرین بوٹس اسکیم ہم 500 ملین روپئی نا خڑچ آن بناکننگک۔ حکومت کرکی علاقہ غاتیٹی پنچ بیچ پارک جوڑ کننگ نا ہم ڈٹ اس جوڑ کرینے وخت اس کہ دامسخت کن اینخو سال 250 ملین روپئی جتا کننگانے۔ اینخو مالی سال اٹی کرکی سیل وسواتی ہند آتیا ریسٹ ہاؤس، ریسٹورنٹ، موٹلز، جہانی فاسٹ فوڈ چینز، واش روم و ہلہلہ ئی رسپانس ہند آتا جوڑ کننگ کن 150 ملین روپئی تخنگانے۔ اومستی پارے کہ دافتے بنداوی انفراسٹرکچر سپورٹ سسٹم و کنوئی آ ساف دیر انا فراوانی کن اسہ جامع حکمت عملی اس تیار کننگانے۔ اوپارے کہ ماہی گیری بلوچستان نا کرکی علاقہ غاتیٹی مخلوق کن روزگار نا غٹ آن بھلا ذریعہ ءِ۔ اومستی پارے کہ کرکی علاقہ غاتیٹی 8 فشنگ زون جتا کننگ کن 200 ملین روپئی نا خڑچ آن فزیبلٹی اسٹڈی کننگ انگ ءِ۔ اومستی پارے کہ سمندری حیات آتا رکھ اکن درخت خلنگ نا کاریم برجاءِ و گوادر اٹ سن سیٹ پارک اس ہم تفنگ انگ ءِ۔
