اسلام آباد۔ 06 اگست (اے پی پی) وزیر خارجہ مخدوم شاہ محمود قریشی پارینے کہ سلامتی کونسل نا ایجنڈا پیدوار کرے کہ کشمیر نا جھیڑہ جہانی ءُ ویل اسے، 55 سال آن پد دا ویل آ مسٹ میکو وار سلامتی کونسل اٹ شرہ مس، مہالو داوڑ اسُل متنے۔ پنچ شنبے نادے آ تینا اسہ بیان اسے ٹی وزیر خارجہ پارے کہ مہالو داوڑ اسُل متنے کہ کشمیر نا ویل سیکورٹی کونسل اٹ اسہ سال اٹ مسٹ میکو واراوڑآ شرہ مرے۔ بھارت پبی کوشست کرے کہ دا شرہ مف ولے اودے بے سہبی مس۔ اوپارے کہ ای سلامتی کونسل نا صدر ءِ چھٹی نا کلہو اٹ معلومدار کریسٹ کہ بھارتی غیر کانودی مقبوضہ جموں و کشمیر نا حالیت ترندی اٹ خراب مننگ ءِ، بھارت مچ آ ڈیہہ نا امن و ایمنی ءِ گہیو تخانے، ای صدر سلامتی کونسل آن خواست کریٹ کہ دا ویل آ دمدستی وڑاٹ شرہ کننگے۔ وزیر خارجہ پارے کہ ای بے کچ منت وار اُٹ کہ کنا دا درخواست آ 72 گھنٹہ ٹی نئے بیرہ اودے ایجنڈا غا تخنگا بلکن داڑآجوان شرہ مس۔ 15آن 14 باسک ملک آک دا شرہ ٹی بشخ ہلکر۔ ہندوستان ہرادا تاثر تننگ نا کوشست کریکہ کہ دا ہڑتوم آ کنڈاتا یا تہہ نا ویل اسے اونا نفی مس۔ سلامتی کونسل نا ایجنڈا پیدوار کرے کہ دا جہانی ءُ ویل اسے۔ 55 سال آن پد دا ویل آ مسٹ میکو وار سلامتی کونسل اٹ شرہ مس و ہُننگ نا ہیت دادے کہ دا شرہ 5 اگست نا اہم ءُ دے اس اڈ ہلک۔ دا اللہ تعالیٰ نا فضل و کرم اٹ پاکستان کن اسہ پین سفارتی سرسہبی اسے۔ ای مچ آ قوم انا منت وار اُٹ کہ اوفک ہرکہول آ جلوس کشار۔ اوپارے کہ مر مر انگا علاقہ غاتا مخلوق ہم مقبوضہ کشمیر نا باتی تتون یکجہتی نا درشانی ءِ کریر۔ ای غٹ سینیٹر آتا منت وار اُٹ کہ اوفک امنائی وڑاٹ وزارت خارجہ نا کنڈآن پیش کروک قرارداد ءِ منظور کریر۔ وزیر خارجہ چیئرمین سینیٹ صادق سنجرانی صاحب نا ہم منت واری ءِ ہرفے کہ او چنکو وخت اسے ٹی دیوان اس اڈ تس۔ وزیر خارجہ پارے کہ صدر پاکستان عارف علوی نا ہم منت وار اُٹ کہ او تینا خیال آتا درشانی ءِ کرے۔ وزیراعظم عمران خان درو مظفرآباد آ ہنا و آزاد جموں و کشمیر نا کانود ساز اسمبلی تون مخاطب مس۔ پاکستان نا ہرا پوسکن آ سیاسی نقشہ مون آ بسنے اونا بھاز است بڈی مس و مخلوق آتا حوصلہ پین زیات مس۔ کشمیر نا باندات آ مچ آ قوم اتفاق کریر۔ سینیٹ نا حب الوطنی نا جوزہ غان سرشارئس۔ نن کشمیر نا ویل آ گپ وتران کن وزارت خارجہ ٹی غٹ سیاسی جماعت آتا راہشون آتے بٹنگان، ننا است خواہی ئس کہ جے یو آئی ایف نا ڈل ہم ننتون اوار مروسس۔ وزیر خارجہ پارے کہ مولانا فضل الرحمان تو تینٹ کشمیر کمیٹی نا چیئرمین رہینگانے اودے تو ویل انا غٹ آن زیات سما ئس۔
