80 لکھ کشمیری تینا اُراتیٹی بند، کوزہ گیر بھارتی فوج انا کنڈآن بھلو کچ اسے آ انسانی حق آتا بھلا خلاف ورزی تے ڈکنگ کن پیشن نا دنیا غان اوفتا مواصلاتی رابطہ غاتے کشکنگانے، ورناتے جعلی مقابلہ غاتیٹی عدالت آن ایڑتر شہید کننگ انگ ءِ و پن نا پٹنگ نا کارروائی ہڑدے مننگ ءِ
اسلام آباد۔ 05 اگست (اے پی پی) وزیراعظم عمران خان پارینے کہ 80 لکھ کشمیری تینا اُراتیٹی بندی نا زند ءِ تیر کننگ ءُ، بھارت نا کوزہ گیر فوج انا کنڈآن بھلو کچ اسے آ انسانی حق آتا بھلا خلاف ورزی تے ڈکنگ کن پیشن نا دنیا غان اوفتا مواصلاتی رابطہ غاتے کشکنگانے، ورناتے جعلی مقابلہ غاتیٹی عدالت آن ایڑتر شہید کننگ انگ ءِ و پن نا پٹنگ نا کارروائیک ہڑدے مننگ ءُو کشمیر نا حقی سیاسی سرکڑدہ غاک زندان تیٹی بند ءُ، 5 اگست 2019ء نا بھارتی گام گیج غیر انسانی فوجی گھیڑ و مواصلاتی رابطہ غاتے کشکنگ انسانیت نا برخلاف ڈوہ اسے، 5 اگست 2019ء نا بھارت نا غیر کانودی و اسہ کنڈی گام گیج ءِ اسہ سال پورو مننگ آ اڈ تروک آ یوم استحصال نا وخت آ اسہ کلہو اسے ٹی وزیراعظم عمران خان پارے کہ بھارت نا غیر انسانی فوجی گھیڑ و مواصلاتی بندش مقبوضہ جموں و کشمیر نا مخلوق نا زندو اوفتا روزگارءِ بھس کرے و اوفتا شناخت ءِ گڑتی تا باٹی تسنے۔ اوپارے کہ بھارت نا انتہاپسند و ودیک است خواہی سوچ تخوک آ بی جے پی آرایس ایس نا نمائندہ بھارتی حکومت ہندتوا ایجنڈاءِ مون آ دننگ ءِ و بھارتی حکومت ڈیہہ ٹی آبادی ناتناسب ءِ بدل کننگ خواہک و مسلمان اقلیت ءِ اقلیت اٹ بدل کننگ نا کوشست کننگ ءِ ہراکہ اقوام متحدہ نا سلامتی کونسل ، جہانی کانود و خاص وڑاٹ چارمیکو جنیوا کنونشن نا پاش آن پاش خلاف ورزی ءِ۔ اوپارے کہ گمان نارداٹ کشمیریک بھارت نا غیر کانودی گام گیج آتے مسترد کرینو و پاکستان، پارلیمنٹ نا باسک، صحافی و انسانی حق انا کارندہ، انسانی حق آتا جہانی تنظیم و جہانی برادری نا باسک آک ہم مقبوضہ جموں و کشمیر اٹ انسانی حق انا پدریسہ بھلا خلاف ورزی تیا تینا توار ءِ بڑز کرینو۔ بھارت دنیانا مون آ اسہ جارح و جابر ملک اسے نا وڑاٹ پاش مسنے و اونا پن نا سیکولر و جمہوری دعواک ہم پورو وڑاٹ پاش مسنو۔ مقبوضہ جموں و کشمیر نا گھیڑ انا گواچی الس کن و انصاف و انسانی شرف کن دا المی ءِ کہ جہانی برادری دمدستی نیام تمے و مذمت نا تینا لوز آتے اٹ عملی گام گیج کے تانکہ بھارت کشمیری الس نا برخلاف ساڑی ظالمانہ کارروائی تے بند کے۔ اوپارے کہ پاکستان مدام تینا کشمیری ایڑھ و ایلم تتون تفوک مریک و نئے نن و نئے کشمیری الس نا برخلاف بھارتی غیر کانودی گام گیج و ظلم و جبر ءِ امنا کینہ۔ اوپارے کہ بھارت مہالو آن جہانی برادری اسکان رسینگ کن کشمیری الس نا توار ءِ توننگ اٹ بے سہب مسنے و داسہ بھارت منصفانہ حق و بنداوی آجوئی تا خواست ءِ کروک آ الس آ ہندتوا سوچ ءِ مسلط کننگ اٹ بے سہب مریک۔ اوپارے کہ بھارت بایدے دا پہہ مرے کہ ہر کشمیری نا شہادت و ہر کشمیری نا اُراءِ ہُشنگ یا بھس کننگ کشمیری الس نا بھارتی کوزہ غان آجوئی نا عزم ءِ پین سوگوی ایتک۔ کشمیری الس نا پورو جہد اٹ پاکستان تینا کشمیری ایلم تتون ہم کوپہ ہمووخت اسکان سلک ہراوخت اسکان کہ او اقوام متحدہ نا تعلقدار قرارداد آتا رداٹ اقوام متحدہ نا کنڈآن آجو و بے کنڈہلوک رائے شماری نا کمک اٹ تینا حق خودارادیت نا درک ءِ خلپس۔
