اسلام آباد۔ 05 اگست (اے پی پی) بنجائی وزیر ڈٹ بندی، شونداری و خصوصی گام گیج اسد عمر پارینے کہ وزیراعظم عمران خان نا وژن ءِ کہ او بلوچستان نا الس ءِ گچین انفارمیشن ٹیکنالوجی و توانائی نا آسراتی فراوان کے، و ملک انا نزور انگا تپہ و علاقہ غاتے اولیت ایتے۔ داخیال آتا درشانیءِ او تینا کماشی ٹی چارشنبے نادے آ اسلام آباد اٹ صوبہ بلوچستان اٹ شونداری کاریم تا بابت دیوان اٹ گپ وتران کرسا کرے۔ دیوان اٹ وزیر سمندری امور علی زیدی، وزیر آبی وسیلہ فیصل واوڈا، وزیر صنعت و پیداوار حماد اظہر، وزیر انفارمیشن اینڈ ٹیکنالوجی، وزیر واپار سلاہکار وزیراعظم عبدالرزاق داؤد، ڈپٹی چیئرمین پلاننگ کمیشن ڈاکٹر محمد جہانزیب خان، سیکرٹری ڈٹ بندی مظہر نیاز رانا و سینئر عہدیدار آک ہم ساڑی ئسر۔ بنجائی وزیر صوبائی حکومت ءِ باوری کرفے کہ اونا وزارت شونداری ڈٹ آتیکن زر جاری کیک۔ اوپارے کہ بلوچستان نا گچینی کن انت کہ ڈٹ اس جوڑ کننگانے، اودے صوبہ نا غٹ اسٹیک ہولڈر آتا پیشگی سلابت اٹ حتمی دروشم اس تننگک۔ بنجائی وزیر بلوچستان نا بابت اِرا کمیٹی ٹہیفے۔ وزیر ڈٹ بندی اسد عمر دیوان اٹ بلوچستان نا مراعات یافتہ بشخ آتیٹی وزیراعظم نا منصفانہ شونداری نا بابت اِرا خصوصی کمیٹی جوڑ کرے۔ بنجائی وزیر دہ جتا سرکاری وزارت آتا دیوان نا کماشی ءِ کرے و اوفتے گوادر و بلوچستان خاص وڑاٹ سویلی بلوچستان نا شونداری کن ترند رفتار ٹریک نا بنداو آ اسہ پروگرام اس تیار کننگ نا پارت کرے۔ سویلی بلوچستان کن دا خصوصی گام وزیراعظم نا پارت آ ہرفنگ انگ ءِ ہرا پاکستان نا شون ہلوک بشخ آتے شونداری نا اسہ بڑزکو کہول اسے آ اتنگ کن اولیتی وڑاٹ دمدستی و پبی گام گیج ہرفنگ خواہک۔ 24 جولائی آ وزیراعظم عمران خان نا کماشی ٹی قومی شونداری کونسل اسد عمر ءِ غٹ اسٹیک ہولڈر آتا سلابت اٹ پروگرام اس تیار کننگ نا پرمان کریسس۔ اسد عمر اِرا کمیٹی جوڑ کرے۔ اسہ کمیٹی نا کماشی ءِ ڈپٹی چیئرمین پلاننگ کمیشن ڈاکٹر جہانزیب خان کیک و ایلو کمیٹی نا سمندری امور نا وزیرعلی زیدی و سلاہکار واپار عبدالرزاق داؤد نا کماشی ٹی مریک۔ ڈپٹی چیئرمین پلاننگ کمیشن محمد جہانزیب خان نا کماشی ٹی کمیٹی آبی وسیلہ، روڈ، کشت وکشار، سیل و سوات، توانائی و بنداوی پنجر نا علاقہ غاتیٹی خذمت آتا فراوانی ءِ گچین کننگ کن بلوچستان نا شونداری کن اسہ لائحہ عمل اس جوڑ کیک وخت اس کہ وزیر و سلاہکار نا کمیٹی گوادر نا شونداری نا ڈٹ آ عمل کیک۔ اینخو مالی سال اٹی بنجائی و صوبائی حکومت آک بلوچستان نا شونداری آ جم وڑاٹ 200 ارب روپئی خڑچ کیرہ۔صوبائی حکومت نا سالانہ شونداری ڈٹ آتا رداٹ 118 ارب روپئی و پبلک سیکٹر ڈویلپمنٹ پروگرام نا رداٹ 82 ارب روپئی خڑچ مریک۔
