پاکستان کشمیر نا ویل انا پرامن ایسری ءِ خواہک، مودی سرکار فوجی گھیڑ اٹ مچ آ دامان ءِ زندان اٹ بدل کرینے، چیئرمین سینیٹ محمد صادق سنجرانی

اسلام آباد۔ 05 اگست (اے پی پی) چیئرمین سینیٹ محمد صادق سنجرانی پارینے کہ پاکستان کشمیر نا ویل انا پرامن ایسری ءِ خواہک و امن نا اہمیت ءِ پہہ مریک، غٹ ویل آتا ایسر ڈائیلاگ ءِ و جنگ اسہ ویل اسے ناہم ایسر اف، 5 اگست انسانی تاریخ نا اسہ تہارءُ دے اسے، ہراتم غیر کانودی بھارتی مقبوضہ کشمیر اٹ مودی سرکار انسانی حق آتے لتاڑنگ نا اسہ پوسکن ءُ درور اس ہلا، و فوجی گھیڑ اٹ مچ آ دامان ءِ زندان اٹ بدل کرے، انسانی تاریخ اٹ داوڑنا بدترین درور ہچ ءُ جاگہ اس ملیپک۔ چارشنبے نادے آ تینا اسہ کلہو اسے ٹی چیئرمین سینیٹ پارے کہ دا مریس انگا فوجی گھیڑ ہراٹی بھارتی فوج انا درندگی کاٹم آن گدرینگسا چنا، بزرگ، زالبول و کودک کشمیری تے ظلم و جبر انا شست کرے ہراڑآ جہانی ادارہ غاک ہم سوج ہرفیر و بھارت جہانی کہول آ تنیا مسنے۔ اوپارے کہ دا غٹ حالیت آتا رداٹ بھارتی حکومت نا گام گیج آن ڈیہہ نا امن نا بھلو دِکہ اس لگا، و علاقائی شونداری و شونہالی نا کسر اٹ اڑاند سلفنگ نا کوشست کننگا، پاکستان کشمیر نا ویل انا پرامن ایسری ءِ خواہک و امن نا اہمیت ءِ پہہ مریک، غٹ ویل آتا ایسر ڈائیلاگ ءِ و جنگ اسہ ویل اسے نا ہم ایسری اف۔ اوپارے کہ جہانی تاریخ داہیت انا شاہدی ءِ کہ بین الریاستی ویل آک مدام مذاکرات نا میز آ ایسر مسنو و پائیدار امن ہنداوڑاٹ دوئی کننگ مریک ولے داڑآن چپ بھارت چم بازی کرے و مدام ڈیہہ نا تھانیدار مننگ نا کوشست کرے ہراٹی او بھاز بے وڑ بے سہب مس، اینو 5 اگست 2020ء ءِ و غیر کانودی بھارتی مقبوضہ دامان اٹ فوجی گھیڑ ءِ اسہ سال اس پورو مسنے و دااسہ سال انا تاریخ بے گناہ و کودک کشمیری تا دترآن پُرتموک ءِ۔ اوپارے کہ جہانی برادری آ داسہ المی مسنے کہ اوتینا کڑد ءِ ادا کرسا بھارت آ زور شاغے و بھارتی غیر کانودی مقبوضہ کشمیر نا الس نا است خواہی و اقوام متحدہ نا قرارداد آتا رداٹ دا متکن آ ویل ءِ ایسر کرفے۔