اسلام آباد۔ 05 اگست (اے پی پی) بھارت نا کنڈآن غیر کانودی کشمیر نا کوزہ ٹی 5 اگست نا گام گیج نا اسہ سال پورو مننگ آ یوم استحصال نا چرجوئی ٹی وزارت امور کشمیر و گلگت بلتستان نا کنڈآن واک اسے نا بست بند کننگاہراٹی بھلو کچ اسے ٹی شاریک بشخ ہلکر۔ چارشنبے نادے آ یوم استحصال نا چرجوئی ٹی کشمیر یکجہتی واک کنونششن سینٹر آن بناکرے۔ واک اٹ الس نا بھلو کچ اس بشخ ہلک۔ بشخ ہلوک آک کشمیری نا حق اٹ نعرہ خلکر۔ بشخ ہلوک آک پاریر کہ کشمیری تے اوفتا حق خودارادیت تننگے، تدوک آ سال 5 اگست نا بھارتی گام گیج آتے مسترد کینہ۔ بنجائی وزیر امور کشمیر و گلگت بلتستان علی امین خان گنڈاپور واک اٹ بشخ ہلک۔ اوتینا تران اٹ پارے کہ اگست 2019ء نا دے مقبوضہ کشمیر نا تاریخ اٹ اسہ پین تہار ءُ دے اسے، تدوک آ سال دادے بھارت اسہ وار ولدا غٹ جہانی کانود و اقوام متحدہ نا قرارداد آتے لتاڑا۔ علی امین گنڈاپور پارے کہ بھارت غیر کانودی مقبوضہ کشمیر آ تینا ناروا کوزہ ءِ سوگو کننگ نا قابل مذمت کوشست کرے۔ بھارتی گام گیج آرایس ایس نا ہندوتوا سوچ انا عکاسی ءِ کیک، بھارتی گام گیج آتا مسخت اقلیت خاص وڑاٹ مسلمان آتون پرخ کننگ نا ءِ۔ علی امین گنڈاپور پارے کہ لکھ آ کشمیری تے تینا ہی اُراتیٹی بندی کننگانے، مقبوضہ کشمیر ءِ دنیا نا غٹ آن بھلا زندان جوڑ کننگانے۔
