مودی سرکار نا ودیک است خواہی و خارتس گام گیج آک مچ آ ڈیہہ نا امن و سلامتی ءِ گڑتی تا باٹی تسنو
اسلام آباد۔ 05 اگست (اے پی پی) اسپیکر قومی اسمبلی اسد قیصر و ڈپٹی اسپیکر قاسم خان سوری مقبوضہ کشمیر اٹ کشمیری تا برخلاف بھارت نا غیر کانودی گام گیج و ظلم و جور انا سخت انگا لوز آتیٹی مذمت ءِ کرسا پارینو کہ کشمیر نا فوجی گھیڑ آن کشمیری الس نا جہد آجوئی ءِ چٹفنگ مفک۔ کشمیر نا آبادیاتی پنجر نا بدلی کن بھارت نا کنڈآن کروک آ غیر کانودی گام گیج دنیا نا دمدستی چکار نا چاری ءِ۔ چارشنبے نادے آ یوم استحصال نا وخت آ تینا جتا جتا کلہو آتیٹی اوفک پاریر کہ بھارت فوجی گھیڑ انا کمک اٹ مقبوضہ جموں و کشمیر نا الس نا تحریک آجوئی ءِ توننگ اٹ اسُل سرسہب مفک۔ اوپارے کہ بھارتی غیر کانودی مقبوضہ جموں و کشمیر اٹ فوجی گھیڑ و غیر کانودی گام گیج آک بے کچ شرمناک و مذمت نا قابل ءُ۔ بھارتی حکومت خاص وڑاٹ مودی سرکار نا استحصالی و ودیک است خواہی عزم دنیا ٹی پاش مسنے۔ اوفک پاریر کہ ملک انا غٹ سیاسی جماعت آک کشمیر نا ویل آ اسٹ ءُ، ملک انا غٹ سیاسی جماعت آک و پارلیمنٹ بھارت نا 5 اگست نا غیر کانودی و اسہ کنڈی گام گیج آتا ترندی اٹ مذمت ءِ کیرہ۔ اسد قیصر پارے کہ بھارتی حکومت بھارتی آئین آن آرٹیکل A-35و 370 نا چٹفنگ نا غیر کانودی گام گیج آن پد ہم کشمیری تا تحریک آجوئی ءِ توننگ اٹ بے سہب مسنے، کشمیری الس آ کروک آ بیدادی بھارت نا انتہاپسند حکومت نا اصل ایجنڈاءِ پاش کرینے، مودی سرکار نا ودیک است خواہی و خارتس گام گیج آک مچ آ ڈیہہ نا امن و سلامتی ءِ گڑتی تا باٹی تسنے، اوپارے کہ پاکستان کشمیر نا ویل ءِ کشمیری الس نا است خواہی و اقوام متحدہ نا سلامتی کونسل نا قرارداد آتا رداٹ ایسر مننگ اسکان کشمیری الس نا مخ تفی ءِ برجاتخک، پاکستانی حکومت و پارلیمنٹ غٹ علاقائی و جہانی فورم آ کشمیر الس آ کروک آ بھارتی بیدادی تا برخلاف توار بڑز کرسا کیرہ۔ اوپارے کہ آئین آن آرٹیکلزاA-35و 370نا چٹفنگ غیر کانودی ءِ و اقوام متحدہ نا سلامتی کونسل نا قرارداد آتا خلاف ورزی ءِ۔ اوپارے کہ 5 اگست 2019ءنا غیر کانودی گام گیج مچ آ دنیا نا چکار نا چاری ءِ، انتئے کہ دا گام گیج آن نئے بیرہ مقبوضہ جموں و کشمیر نا آئینی حیثیت ءِ بدل کننگانے بلکن دا کشمیری تا گیشتری ءِ اقلیت اٹ بدل کننگ نا ناپاک کوشست اسے، جھیڑہ ئی علاقہ نا حیثیت اٹ کشمیری حیثیت جہانی کہول آ امناکروک ءِ، بھارت نا حکومت اقوام متحدہ نا قرارداد آتا خلاف ورزی ءِ کرسا کشمیر نا بھارت تون الحاق نا غیر کانودی گام ءِ ہرفینے۔ ڈپٹی اسپیکر قاسم خان سوری پارے کہ مقبوضہ کشمیر اسہ نیو کلیئر فلیش پوائنٹ اسے، مودی سرکار نا کنڈآن آرٹیکلز A-35 و 370نا چٹفنگ کشمیری الس نا حق آ ڈاکہ خلنگ آنبار ءِ، آئی آئی او جے کے ٹی ڈومیسائل نا پوسکن آ کانود کشمیری الس نا استحصال ءِ کننگ نا کوشست ءِ۔ اوپارے کہ جہانی برادری مقبوضہ کشمیر اٹ بھارتی فوج انا کمک اٹ مروک آ انسانی حق آتا لتاڑتا سختی اٹ نوٹس ءِ ہلے، جہانی برادری مقبوضہ کشمیر اٹ انسانی حق آتا خلاف ورزی تا چٹفنگ و کشمیر نا ویل انا منصفانہ ایسری کن تینا کلیدی کڑد ءِ ادا کے۔
