صدر مملکت ڈاکٹر عارف علوی، چیئرمین سینیٹ صادق سنجرانی، اسپیکر قومی اسمبلی اسد قیصر، وزیر خارجہ شاہ محمود قریشی، سینیٹر فیصل جاوید و ایلو پارلیمنٹ نا باسک آک بشخ ہلکر
اسلام آباد۔ 05 اگست (اے پی پی) یوم استحصال نا وخت آ چارشنبے نادے آ وزارت خارجہ غان ڈی چوک اسکان مذمتی واک اس اڈ ہلک، ہرانا کماشی ءِ وزیر خارجہ مخدوم شاہ محمود قریشی کرے۔ واک اٹ بنجائی وزیر امور کشمیر علی امین گنڈاپور، خصوصی کمکار قومی سلامتی معید یوسف ئسک ہم بشخ ہلکر۔ وزیراعظم سیکرٹریٹ آن صدر پاکستان ڈاکٹر عارف علوی،چیئرمین سینیٹ صادق سنجرانی اسپیکر قومی اسمبلی اسد قیصر، سینیٹر فیصل جاوید و پارلیمنٹ نا باسک آک بشخ ہلکر۔ وزیراعظم سیکرٹری آن ڈی چوک اسکان دا مذمتی واک انا کماشی ءِ صدر پاکستان عارف علوی کرے۔ واک اٹی مظلوم کشمیری تتون یکجہتی نا درشانی ءِ کننگ کن اسہ منٹ اس چُپ سلنگا۔ واک اٹ سول سوسائٹی، میڈیا و الس نا بھلو کچ اس بشخ ہلکر۔ بشخ ہلوک آک مقبوضہ کشمیر نا مظلوم تا حق اٹ و بھارتی بیدادی نا برخلاف نعرہ خلسا کریر و اوفک چندی پلے کارڈ آتے ہرفیسر ہرافتے ٹی اقوام متحدہ و انسانی حق آتا جہانی تنظیم تیان مقبوضہ کشمیر اٹ کرفیو ءِ ہرفنگ نا خواست درج ئسر۔ ڈی چوک آ وزیر خارجہ مخدوم شاہ محمود قریشی و صدر پاکستان عارف علوی ئسک تران کریر۔
